Aizawl: Nimin, January 11 kha Mizorama missionary hmasa ber pahnih, Rev JH Lorraine (Pu Buanga) leh Rev FW Savidge (Sap Upa) ten chanchin \ha hril tura Mizoram an thlen champhaphak, Missionary Day a ni a, Baptist Kohhranin a theih ang angin tualchhung kohhranah an lawm.
Baptist Church of Mizoram headquaters chuan he ni hi Pathian hnena lawmthu sawina hun atana hmang turin tualchhung kohhrante a hriattir a, thupui hranpa siam a ni lo.
Hri leng avangin Mizoram hmun hrang hranga tualchhung kohhranten Missionary Day lawmna hun an hman dan a inang lo a, kohhran tam takin awmni khamin Pathian hnena lawmthu sawi inkhawm an nei a, inkhawm bâna thingpui ruai buatsaih an \heh bakah hmun \henkhatah ruaipui buatsaih an awm.
Hetihlai hian khawpui kohhran \henkhat, hri lengin a chim buai deuhte chuan chawhma inkhawm programme chauh an hmang thei thung.
Lunglei khawpuiah chuan Missionary Day hi mi eng emaw zatin serhin, sumdawnna leh dawr tam zawk a inkhar a, auto rickshow leh taxi service pawh tlem tê tih chauh lo chu tlan chhuak hmuh tur an awm lo.
He ni pual hian nimin zing khan Zarkawt Presbyterian Kohhran chuan Sap Upa leh Pu Buanga te awmna \hin, Thingpuihuan Tlang, Zarkawtah hun an hmang a, he hun hi Zarkawt Kohhran Chairman, Upa Lalrochuanga Pachuau-in a kaihruai a, Rev Dr Lalchungnunga’n thuchah a sawi.
Kum tinin he ni hi ram pumah hman a nih theih nan Mizoram sorkar chuan sorkar chawlh atan 1989 a\ang khan a hmang \hin a. 1994 Mizoram Gospel Centenary hman a nih hnu a\ang phei kha chuan Missionary Day hi uar zawka hman a ni chho ta a ni.
Missionary hmasate pahnih, Sap Upa leh Pu Buanga te chuan January 11, 1894 khan Sairang thlanga Changsil kai an thleng a ni.