Kumin chhungin Mizoramah Covid-19 hri kai mi 6,159 hmuh chhuah a ni tawh a, nimin kha kumin ni 11 chhunga ni khata hri kai hmuh chhuah tam ber a ni.
Janaury 10, 2022-a sample endik zawng zawng 8,477 atangin hri kai thar 1,513 hmuh chhuah a ni a. Hri kai hmuh chhuah zat hi za zelah 17.85 a ni a. Hri kai hmuhchhuah thar zingah hian natna lang chhuak mi 1,081 awmin, a bak zawng mi 432 hi natna lang chhuak lo an ni thung.
Hri kai hmuh chhuahte hi RAT atangin 1,363 awmin, heng zingah Khawzawl district atanga hmuh chhuah tam berin mi 364 an ni a. Aizawl district-in dawtin mi 285 an ni a. District hrang dang – Serchhip-ah 251, Mamit-ah 108, Saitual-ah 92, Champhai-ah 82, Lunglei-ah 74, Hnahthial-ah 45, Lawngtlai-ah 29, Kolasib-ah 22, Siaha district-ah 11 hmuh chhuah a ni bawk.
ZMC RT-PCR atanga hri kai hmuh chhuah mi 98-te hi Aizawl district-a mi vek an ni a, an zingah hian natna lang chhuak mi pathum awmin, natna lang chhuak lo mi 95 an ni.
TrueNAT kaltlanga hri kai hmuh chhuah thar mi 46-te chu mipa 18 niin, hmeichhia 28 an ni thung. Heng zingah hian natna lang chhuak mi 18 awmin, natna lang chhuak lo mi 28 an awm bawk.
Fluorescent Immunoassay hmanga hri kai hmuh chhuah thar mi paruk awmin, Aizawl district chhunga mi vek an nih bakah, natna lang chhuak vek an ni.
Kumin January 1 khan hri kai mi 265 hmuhchhuah a nih hnuah a tuk, January 2-ah hri kai hmuhchhuah a tlahniamin mi 84 an ni a. Hemi hnu hian a ni telin hri kai hmuhchhuah a pung zel a. January 9-ah mi 903 hmuh chhuah niin kuminah tam berin, heihi nimin January 11 khan mi 1513 hmuh chhuah niin a rawn khum ta a ni.
Heti hian, tun ni 11 chhungin Mizoramah hri kai mi 6,159 an tling tawh a. Nimin khan mi pahnihin hri vangin nunna an chân bawk.