Manipur-a state assembly inthlan lo awm turah rorel lai, BJP leh Congress chu inbei nasa ber tur nia a lan thu ABP-C VOTER-in ngaihdan a lakah tar lan a ni.
Party pahnih – BJP leh Congress hian vote tla pawh 36% leh 33% vel an hmuh rin a ni.
Manipur assembly inthlan hi thawh hnihin, February 27 leh March 3-ah neih tur a ni a, vote tlate chu March 10-ah chhiar a ni ang.
Survey neihah hian assembly bial 60-a mihring 2,100 vel zel ngaihdan lak a ni a. BJP chuan chhe te chauhvin Congress lakah chungnunna an chang dawn niin a lang.
Ngaihdan lak a\anga a lan dan chuan BJP hian Congress chu tlemin an hneh dawn a. Tuna a lan danah chuan rorel lai hian bial 25 lain Congress hian bial 24 an chang ve thung ang.
Naga hnam bil deuh party, NPF pawhin bial li an chang phak tura ngaih a ni a, mi dangten bial sarih erawh an inchan sem tura ngaih a ni.
Manipur-a inthlana mipuiin an vote hi hnam bil azirin a danglam thei hle a. Naga hnam inhlawm khawm leh Manipuri-a tribal hrang hrangten an thlawp lam azirin inthlan result hi innghat thei niin an ngai.
Manipur inthlan hi BJP-in hmarchhak an thunun tih lantir nan a pawimawh hle a, a bik takin tun hnaiah state chhunga venhimna lama thil thleng neuh neuh avangin BJP tan inthlan pawimawh tak a ni.