Myanmar atanga Mizoram kaltlanga dan loa kuhva tawlh luh boruak kal zelah Champhai district chhunga lirthei neitu leh khalhtu pawl panga chuan Champhai Bawrhsap Maria CT Zuali chu Champhai atanga sawn chhuah an duh.
Lirthei neitu leh khalhtu pawl panga – Champhai District Truck Owners’ Assn, Mizoram Truck Driver Assn (MTOA) Sub Hqrs Champhai, Champhai District Border Trade Transport Union (CTU) Mizoram, 407 Truck Owners’ Association Chamhpai, Champhai 207 & Pickup Owners’ Association Champhai leh Champhai district Tripper Owner Association hruaitute chu tun hnai khan an thukhawm a, bawrhsap hi sawn chhuak turin chief minister ngen an rel.
Heng pawl panga thukhawm chuan ramria sumdawnna chu chhungkaw tam takin innghahna atan an hmang nasa a, an innghahna ber border trade sumdawnna danchah meka a awm chu an hrethiam lo a, heng an harsatna tawhna chhan bul tumtu, Maria CT Zuali chu Champhai atanga sawn chhuah an duh a ni.
Lirthei neitu leh khalhtu pawl pangate chuan Champhai bawrhsap sawn chhuak turin chief minister hi ngen tum mah se ngenna erawh an la thlen lo a, ngen an tumna lehkha ni awm social media-ah a darh tak avangin rorel that leh an tum niin thudawnna chuan a sawi.