Delhi-a BJP headquarters-a thawktu mi 42 chuan COVID-19 an kai tih hmuh chhuah a ni a. Hei hi BJP rorelna sang thutkhawm neih hmaa Thawhtannia endik rûnpui neih atanga hmuh chhuah a ni.
Hri kai tam ber hi pisa tihfai lama thawktu (sanitation worker) an ni deuh ber a, an zavaiin inkhung hrang tura tih an ni.
Delhi-a Minto Road-a BJP hmunpui hi tihthianghlim (sanitise) zui a ni bawk.
BJP hian dan thar zamin an hmunpuia thawktute chu thutkhawm pawimawh neih dawn apiangin endik zel an ti a. “Headquarters hi thil pawimawh tak a nih loh chuan dawr leh tlawh lo tura tih a ni bawk,” tiin BJP hotu sang pakhat chuan news agency ANI a hrilh.
Thawhlehni khan BJP hotu liante chu Uttar Pradesh assembly inthlan tur thlirin an thukhawm a. Nilaini khan an thukhawm nawn leh bawk.
Thawhtanni khan BJP chief JP Nadda chuan hri a kai thu a lo sawi tawh a. “Natna ka neih deuh avangin COVID-19 ka kai leh kai lo ka inendik a, ka lo kai ngei a; mahse, ka tha. Doctor-te thurawn angin ka awm hrang a, tun hnaia ka bul hnaia awmte chu lo inendik ve turin ka ngen a ni,” tiin Hindi-in Twitter-ah a tar lang.
Thawhtanni vek khan hruaitu lawk zingah Karnataka Chief Minister Basavaraj S Bommai, Bihar Chief Minister Nitish Kumar, Defence Minister Rajnath Singh leh Union Minister of State for Defence Ajay Bhatt te pawhin hri an kai tih hriat a ni.
Thawhlehni khan BJP hruaitu lawk, Uttar Pradesh incharge pawhin COVID-19 a kai a. National vice president ni bawk, Radha Mohan Singh hi Thawhtanni zana Lucknow-a thutkhawm pawimawhah a la tel a, Uttar Pradesh Chief Minister Yogi Adityanath leh Uttar Pradesh BJP chief Swatantra Dev Singh te pawh he thutkhawmah hian an tel.
Radha Singh hi inah a inkhung nghal a, Swatantra Singh erawh thawh sariha an inthlan turah an party-in door-to-door campaign a huaihawt chu Thawhlehni tuk khan a la hawng.
India-ah hian darkar 24 liam ta chhung khan hri kai 1,94,720 hmuh niin a hma ni chiah aiin 11% velin an tam.