Indian Institute of Science leh Indian Statistical Institute ten an chhut lawknaah chuan India-a Covid-19 hripui leng thar leh mek chu February atangin a hniam zawnga a kal an ring.
State indawt zela ziaawm hret hretin March-April velah chuan dinhmun ziaawm tak a nih an ring.
Zirna in sang pahnihin an chhutnaah hian a vanglaiah erawh chuan ni khata mi nuai riat thleng kai hmuh pawh a ni thei tih an sawi thung.
An chhut lawkna hi India-a January 10 thlenga hri kai pun dan leh South Africa-a Omicron inkai chak dan behchhanah an hmang a ni.
Scientist-te hian chi (scenario) thumin an chhut a. Mipui zawng zawng (100%) hri kai ang, 60% kai ang leh 30% kai angin an chhut a. Chi thumah hian April-ah chuan a leng reh tawh tur angin an ngai a. 30% leh 60% chauh a nih phei chuan February atanga ziaawm tur leh 100% a nih erawh chuan hun rei zawk awh tur angin an chhut.
India-in dinhmun chhe ber tawnga mi zawng zawng deuhthawin an kai chuan ni tin damdawi in mamawh nuai li chuang an awm rin a ni a. 60% a nih chuan nuai thum chuang hretin an mamawh rin a ni.
A chhe ber dinhmunah ICU mamawh chu mi 20,000 chuang an nih theih rin a ni a. A chhe ber a tawn loh erawh chuan 10,000 leh 15,000 inkar a nih rin a ni.
February atangin hri leng ziaawmin March 1-ah chuan dinhmun pangngai a nih rin a ni a. April, 2022-ah chuan thawh thumna a reh fel rin a ni a, state hrang hranga a reh hun tur erawh a inang chiah lo dawn niin an sawi.
State mal anga an chhutnaah chuan Delhi-ah 60% velin an kai dawn a nih chuan ni khatah mi 40,000 chuang kai an awm an ring a. Maharashtra pawhin a chhe ber a tawng a nih chuan ni khatah mi nuai 1.75 chuang hri kai an awm theih hial an ring bawk.