Mizoram Football Association chuan Thawhlehni khan tun season chhunga inelna kalpui a tumte kalpui dan tur a duang a, football leh futsal inelna hrang hrangte sorkar danin a phal a, hri lengin a tibuai a nih loh chuan kalpui a tum.
District Football Association inelna
MFA Special General Body Meeting lo rel tawh District Football Association hrang hrangte inelna neih hun chu hetiang hian duan fel a ni –
A) MFA Cup, Saitual – March, 2022
B) Inter District Women’s Championship, Hnahthial – April, 2022
C) Inter District Junior Boys (U-17), Siaha – May, 2022
All India Football Federation thuchhuah angin Age Group intihsiakah (Inter District Junior Boys) hian Covid-19 vaccine vawi hnih la tawh chin chiah a tel theih dawn a, hei vang hian District Football Association-te chu an player-te vaccine laktir rang turin MFA chuan a hriattir a ni.
MPL Under 18 & Under 15 League
Mizoram Premier League Under 18 chu May thlaah kalpui tura rel a ni a, he inelnaah hian AIFF thu angin Covid-19 vaccine la tawh chin chiah a tel theih ang.
India ramah kum 18 hnuai lam tan Covid-19 vaccine pek tan mek a ni a, MFA chuan AIFF leh sorkar duh dan angin vaccine la lote chu inkhelh a phalsak dawn lo.
Hetihlai hian Mizoram Under 15 League erawh chu tleirawl/rawlthar vaccine la lo tana inkhelh buatsaih lo tura AIFF atanga MFA-in thu a hmuh angin, tun season chhung chu kalpui theih loh turah MFA chuan a ngai.
Women’s League & Veteran Football
MFA Women’s League chu April-ah neih tura ruahman a ni a, hri lengin a tibuai a nih loh chuan hmeichhiate tana inkhelhna hun hi siam ngei tum a ni a, MFA Women’s Committee kutah a kalpui dan tur hi dah a ni.
MFA chuan tun season chungin kum upa zawkte inelna veteran football pawh kalpui ngei a duh a, hri lengin ziaawm lam a pan a nih chuan a kalpui dan tur lo duang turin MFA Veteran Committee kutah a dah.
Futsal
MFA chuan tun season chhungin futsal inelna hrang hrangte a kalpui dawn a, MFA Futsal Committee-in sorkar SOP leh hri leng dinhmunte thlir chungin futsal inelna kalpui dan turah ruahmanna a siam ang.
MFA Futsal Committee hnuaiah hian MFA Futsal League khel tur club 16 bakah Division One-ah club 62 an inziak lut tawh a, registration-te tihfel ni tawhin, hun remchang hmasaah inelna buatsaih tum a ni ang.
Heng clun inziaklutte inelna bakah hian MFA chuan veteran leh women’s futsal pawh buatsaih turin ruahmanna siam a siam dawn.