World Health Organization chuan Europe khawmualpui chu chawlhkar ruk atanga riat chhungin Omicron Covid variant-in a tuam chhuak hman vek dawn niin a sawi.
Dr Hans Kluge chuan ‘khawthlang atanga khawchhak pan zel’ Omicron chuan a tuam mek a, Delta variant aiin kai an pung chak dawn tih a sawi.
Hei hi WHO-in kum 2022 chawlhkar khatnaa Europe-a hri kai mi maktaduai sarih chuang an awm hman behchhana a chhut lawk a ni.
Hri kai thar zat hi chawlhkar hnih chhungin tuna mi leta tam an ni hman dawn niin a sawii.
“Omicron variant chuan tunah hian khawthlang atanga chhak lam panin khawmualpui a nuai mek a, kum 2021 tawp thlenga ram tinin an buaipui Delta aia nasain kai a ni dawn,” tiin Dr Kluge hian Thawhlehnia thuthar lakhawmtute a kawmnaah a sawi.
Seattle-a Institute for Health Metrics & Evaluation-in an chhut lawkna, chawlhkar ruk atanga riat inkarah Europe-a cheng zahve aia tamin Omicron an kai dawn tih a sawi chu a sawi chhuak bawk.
Europea leh Asia ram lailite chu khawthlang lam ram atanga Balkans lam pana a darh mek zel avangin buai hmabak niin a sawi.
“Ram tin hian hri lenga an dinhmun te, thawktu an neih te, invenna an pek leh an khawtlangin a thlir dan azirin an lo hmachhawn dawn chu a innghat dawn a ni,” a ti.
Tun hnaia zirnaah chuan Omicron hi a hmaa Covid variant dang awm tawhte ai chuan natna a thlen nep zawk tih hmuh a ni a; mahse, inkai a awlsam zawk a, invenna bikima la tawhte pawhin an kai awlsam viau zel tih hmuh a ni.
A kai an tam chuan damdawi in leh thawktu indaih loh a hlauhawm ber nia ngaih a ni.
Thawhtanni khan UK-ah chuan hri kai mi 1,42,224 hmuh belhin mi 77 an thi bawk a. Damdawi in tam tak chu thawktu kal lo hri kai pun chak vangin ‘indaih lo’ dinhmunah an ding mek.
Ram dangah pawh damdawi in an buai tan a. French Health Minister Olivier Veran chuan kar hmasa khan January thla hi damdawi in tan hun khirh a ni dawn tih a lo sawi lawk tawh.
Veran chuan Omicron kaite enkawlna tur damdawi inah khum an dah belh tih a sawi a, Delta avangin miin ICU department an tibuai reng tih a sawi bawk.
Europe khawchhak lam, Poland-ah chuan hri a len atangin mi 1,00,000-in an kai tawh tih an sawi a. Poland now hi a kai zinga thi tam lam (mortality rate)-ah a sang parukna niin an ram mipui 40% zet invenna la lo an la ni bawk.
Russia-a consumer health hotu, Anna Popova chuan sorkar coronavirus task force thutkhawmah hri leng darh zel tur hi thunun a nih loh chuan ni khata mi 1,00,000 kai hun an tawng dawn niin a sawi.
November thla vela ni khata mi 41,335 kai an awm hnuah erawh tunah hian hniam lam an pan leh mek niin Reuters news agency chuan a tar lang a. Popova-i chuan an ramah Omicron kai mi 305 an hriat tawh thu a sawi a, hei aia an tam tawh erawh a ring.
Thawhtanni khan damdawi siamtu, Pfizer chuan Omicron laka mi veng thei tura duan bik vaccine an tichhuak thei hnai tih sawiin March-ah chuan an peih an inring a. Hriselna lama mi thiamte erawh chuan mamawh a ni kher dawn em an la sawi thei lo.