- PL Liandinga
Kum hlui kha kum buaithlak angreng tak a ni kan ti thei awm e. Kan inkharkhip a, hripuiin min nuai a, buai takin kan awm a. Sumdawng pakhat ka hriat phei chuan a sumdawnna a khar tawp a. A khawngaihthlak khawp mai. Sumdawng, dawr hawn mumal theih loh vanga harsatna tawk tam tak an awm ngei dawn tih hi a chiang reng mai a. Sikul neitu, naupang kal mumal theih loh avanga fee lak khawm tur nei lo, chumi avanga pawisa sum a buai te pawh an awm ang. Hripui avanga buai lem lo chu mi tlemte chauh an awm ang a, chung zingah chuan sorkar hnathawk te pawh an tel ngeiin a rinawm. Pisa inkai chhawk te an ti a, mahse hlawh inlak chhawk erawh a awm ve chuang lem lova, tih chi pawh ni meuhvin a lang lo.
Hripui avanga nikum lama buai lo ber ber te zingah chuan kuhva tawlhtute hi an tel mai awm mang e a tih theih. Hripui leng avanga sumdawng dang leh midang an buai em em laiin anni chu an buai thawm ai mahin an buai lo lutuk thawm kan hria a ni ber mai. An kuhva tawlh nasa lutukin midang a nghawng a, Mizorama kuhva chingtuten an buai phah a. An kuhva tawlh nasa lutukin kuhva tawlhna kawngpui, motor lian zawh theih tur khawchhak ram hrang hrangah an a hranpain an sial a. An kuhva tawlhna kawngah sorkar lam an duty avangin sorkar duty lohna kawng a hranpain Mizoram leilungah an rek pawp a. Chu pawh kan Mizoram sorkar chuan a khap thei lo nge, a khap thiam lo nge a khap ngam lo pawh a hriat tawh loh.
Kuhva tawlhtute hian bihruk te hi an thiam awm mang e ka tia. Mizoram police chuan Champhai zawl atanga kuhva phur motor lian panga tlan liam lai an hmu a, mahse an man zui thei lo. An pan tur chu Silchar a ni ang tih a chiang thawkhat a. Silchar pawh lo ni lovin Manipur pawh ni se, Agartala lam pawh ni se motor lian panga, Mizoram police hmuh theih lohva tlan liam hi a khalhtute thiam vang nge engnge mipuiin kan hre lo.
Champhai District chhunga inawpna (administration) thila lal ber, Mizoram aiawhtu chuan kuhva tawlh hi tihrem a tum a, nasa takin a bei a. A dan bawhchhetu zawkin amah chu thubuai an awrhtir ta hlauhva. Khawvel kalphung pangngai leh inawpna danah chuan hei hi thil tih theih loh ni awm tak a nih laiin kuhva tawlhtute chuan an ti thei mai a. A mak ngawt mai.
Kum a lo thar a, kuhva tawlh dotu Champhai D.C chu kuhva phurtu motor neitute leh kuhva neitute (ni chek tur a ni) chuan hnawk an tih em avangin dan kengkawh tura sorkar ruat, Mizoram sorkarin a aiawha a dah chu sawn bo an duh em em a ni tih pawh ziakin an tilang a. An duh ang tak chuan kum a lo thar chuan Mizoram sorkar chuan a ti ta hmak mai a. Keini ang mimawl rual chuan mak kan ti leh em em a.
Kolasib D.C hmingtha tak mai leh fel tak mai pawh ramri depa awmah mipui chuan tha kan ti a, kan thlamuanpui tehlul nen Mizoram sorkar chuan a sawn leh ta mai bawk a. Hemi hma hian Kolasib a Land Revenue Deptt. Officer pakhat pawh Aizawl lam atanga compensation dawntir an tum mi parukte hming a thun tel ve theih loh avangin an sawn tawh e an ti bawk. Posting and Transfer hi hmasawnna lam thlir lovin, kan duh ang zawnga rorel lo te chu sawn zel mai tur an ni em ni tih a ngaihtuah theih.
Kum thar hian Mizoram tan thil tha a thlen dawn em tih hi ngaihtuah ngai tak, mahse keini ang leh mipui tam tak tan chuan ngaihtuah hleih theih si loh a ni. Kum hluia kan awmdan leh kumthar tira kan sorkar hmalakna ngaihtuah chuan beisei tur engnge awm ang aw? tih mai awl tak a ni.
Chhungkaw thilah pawh kumthar hi mi tam tak tan chuan beiseina thar neih hleih theih loh turin hripuiin min chenchilh a. Thil ngaihtuah thiam a har viau. Mahse kan sorkar kalphung hi chu hripui vanga buaina pawh ni chiahin a lang lo. Lungleia RT-PCR khawl bun a harsat em em atang khan hripui hi chuan kan sorkar hrik a ti thak tham lutuk lo a ni mai awm mang e a tih theih a.
Kum thara kan sorkar hmalakna tur engnge ni ang a, he kum thar hian kan sorkarah eng thil tha nge a rawn thlen ang tih ngaihtuah thiam a harsa khawp mai.