- Mahmuaka Chhakchhuak
Hnam fing zawkte chauh ni loin kan thlang vaihote ngei pawh khu keini ai thlawtin sumdawnna kawngah kher hi chuan an lo fing zawkin an ngaihtuahna pawh an lo hmang nasa daih zawk mai tih kan hre awm e. Tumkhat chu Shillongah kan lengkual hi dawr pakhatah lutin an thil zawrhte chu kan thlir kual a, chutah a neitupa chu kan kiang hnaiah rawn kalin an dawr chu an hawn thar ve chauh a nih thu sawiin keini hnen atang chuan thurawn a mamawh thu a rawn sawi a. Chutiang thu kan han hriat tirhah chuan mak kan han ti viau mai a. A dawrah chuan keini chu lut hmasa pawl pawh kan lo ni mai thei a, kan hnen atanga thurawn a beisei ang chuan tihhlawhtlin ngei tumin keini pawh chu hawi kual nawn lehin a dawr bungraw hun dan chu heti hian hung la tiin tha zawk nia kan rin dan kan sawiin reilote hnuah chuan kan chhuahsan ta mai a. Kan chhuahsan hnuah chuan kan sawi angin a rem thain a hung tha em tih erawh kan hre hauh lo nain thurawn beiseia keini min han bia chu sumdawng thiam kan tiin ka fak viau zawk mai a, sumdawng hlawhtling tak ala ni mawlh ang maw le ka ti rilru nauh nauh a.
Phai lam dawr changkang leh hlun zawkahte phei chuan anmahni dawrtute hi an ngaihsak thiam em em a, anmahni dawrtute hming mai bakah Phone number leh Date of Birth te thlengin an lo chhinchhiah sak thlap thin bawk a. Chungte chu vawng tha rengin kum rei tak thleng Birthday wish message an la thawn peih thin. Hei hi min hriat reng vang a ni hauh lo a, an dawra vawi khat emaw chauh thil kan lei a, anmahni kan dawrna avanga kan chunga an lawmna vang leh kan DoB an chhinchhiah vang mai mai chauh mah nisela a dawngtu tan chuan ava lawmawm si em. Hetiang hi mizo sumdawngte hian kan tlin loh thil tak niin a hriat a, vawiin thleng hian hetiang ti hi kan mizo sumdawng zingah hian awm pawh an la awm kher awm lo e. Thil ropui leh lian tak ni lem lo mahsela a dawngtu thinlungah chuan hriatreng a awl bikin anmahni chu dawr leh an chakawm phah thin a ni.
Tumkhat chu mizopa hnenah hian lumeh tir tumin ka kal a, kan In atanga a hlat bawk loh avangin leh mizo a nih hrim hrim bawk avang chuan a thiam pangngaih ve thoin ka hre bawk a tiin ka mamawh hun apiangah biak mai theih turin a Phone number ka dil a. A hnua ka sam alo sei tak viau hnuah chuan meh tir leh tuma ka han biak chuan zing karah chuan meh tur an tlem thin avangin chawhma dar 11;00 velah chauh dawr a rawn hawn dawn thu a sawi a, mak ka ti hle mai. Chutiang chuan a hnuah pawh ka biak leh a chhan dan ngai bawka min chhan leh avang chuan vawiin thlengin amah chu dawr ka tum buai duh ta lo a. Eizawnna dang a neih ka hre bawk si lo a, chutia a eizawnna ber pawh mi zawng zawng dawr hawn hnu chauha hawn a tum reng mai chuan a nikhat sum leh pai lakluh chu a beitham awm mange aw tihte ka ngaihtuah a.
Hetiang deuh bawk hian hmanni chu dawr pakhat hian kalin kan mamawh an neih leh neih loh zawtin an thil zawrh vel chu kan enkual pah bawk a. dawr nghaktu hmeichhia (nula nge nu a nih erawh ka hre chiah lo a) chuan Cell Phone ah hian games khel pah hian min lo chhawnin mi pawh melh chuang lo hian ‘khalaiah khan lo zawng rawh u’ a rawn ti a. A dawra thilzawrh zing ami chu kan lei duh tak pawh lo awm sela dawr hi a chakawm loh em emin kan hria a, nimahsela hmundanga kan hmun tawh loh avangin leh an dawra kan han hmuh tak bawk si ah chuan kan lei ta tho a. Khatianga games khel paha melh pawh min melh loa min chhang kha mak ka ti viau mai a, dawr nghaktu tha tak chu a ni hauh lo mai ti rilru chunga pawisa kan pek zawh hnuah chuan kan chhuak leh mai ta a.
Heng kan mizo dawr pahniha kan thil tawn atang hian kan mizo unaute ngei ngei zawk mah nisela dawr an nawm loh zia leh hnam dang dawr nghaktute nena an inan loh zia kan hrethiam thei mai awm e. Min melh zawkin kan incheina alo nalh lutuk bik lem loh vang chu nge ni ang a, kan hmel alo that uchuak bik lem loh vang chu ni ang tihte ka ngaihtuahnaah a awm nghal bawk a, nimahsela chutiang pawh nisela a thilzawrh lei tumin a dawrah kan lut a nih chuan thildang laklawh nei hauh lo a min lo ngaihsak tur ah ka ngai a. Chutiang a ni bawk si lo chu mak ka ti a, a games khelh lai chu a laklawh mai bakah a thinlung a pe hle mai tih ka hriatin dawr nghak tlakah ka ngai lo a, sumdawnna kawnga kal zel chi ni pawhin ka hre lo a ni.
Chutianga ka han sawina chhan pawh mizote hian thil pakhata thinlung sawrbing tak tak hi kan thiam lo nge kan peih lo ni dawn kan ti thei ngai meuh lo a. Nimahsela sumdawng kan ni emaw zirlai kan ni emaw eng thil timi kan ni a nih pawhin thil pakhata insawrbing hi thil tul tak a ni bawk si avangin mizo zingah hian chutiang mamawh chu tam tak kan awm a. Phai lam leh hmun changkang zawka sumdawngte chuan anmahni dawrtute an ngaihsak zia leh hmel hlim taka an dawngsawng thin leh a hnu kum tam tak thlenga an piannia lawmpuina thu an la rawn thawn zat zat peih ang kher chuan ti lo mah ila hmaichhana ngaihsakna lantir chu kan tih makmawh a ni a, chu tak chu dawr nghaktu tam takin kan tlakchham ber a ni bawk si. Aizawl dawr thenkhatte ngei pawh hian kan Cell Phone number chhinchhiahin an dawra thil thleng thar leh eng eng emawte hi min rawn thawn fo thin bawk a, thinlung hian hetiang hi chu a hlat tak tak thei ngai lo.
He sumdawnna khawvelah hian sumdawngte chuan Customers’ satisfaction hi kan ngaih pawimawh ber tur a ni a, chumi a nih loh chuan sumdawnna nei ve thin mah ila kan hlawhtling thei ngai lo ang. Engvanginnge hnam dang sumdawngte dawr an nawm bik a, kan ram chhungah ngei pawh mi tupawh maiin pan nuam bika kan hriat kan tih chuan anmahni dawrtute ang ngaihsak thiam vang a ni mai. Chu chu kan unau sumdawngte chuan an tlachham tlat si a ni. Dawr nghaktu nui hmel hi a dawrtu tân hmuh a nawm êm êm si laiin anmahni dawrtute hmuha nui hmel pu ngai hauh lote pawh hi kan tam mai a, nui hmel han pu hram hram thei thin sela anmahni tan a that zawk dawn tehlul nen hian.
Vai sumdawngte lah hian mizo mizia hi an han hre thei em em mai bawk si a, tunah phei hi chuan thingtlang kilkhawr tak tak thlengin sumdawnna kua an hreuh tawh a, heti reng a nih chuan tun atanga kum sawm alo thlen leh meuh chuan kan mizo sumdawnna tam tak hi an la nek ral ngeiin a rinawm. Vawiin atang hian sumdawngte hi i harh ang u, dawr inang rau rauah anni aiin dawr kan nuam zawk tur a ni a, anni aiin dawrtu kan ngah zawk bawk tur a ni.