- Robert Zoliana
Kum khat hnuai lam nausen te hi naupang te aiin Covid-19 vanga dam lohna neih theihna remchang an ngah zawk a, a chhan chu an immune system la puitling tawk rih loh vang a ni. Omicron hian dam lohna eng emaw chen a thlen miau mai a, chuvang chuan nausen hriselna hi uluk taka venpui a ngai hle.
A hmasa ber leh pawi-mawh berah chuan nausen pawm leh buaipui lai hian Nute’n mask tha tak an vuah reng tur a ni a, fai takin kut an sil thin tur a ni bawk. Vaccine la full tawh an ni ngei tur a ni a, chhungkaw member dangte paw’n nausen hnaih leh pawm chungchangah an fimkhur hle tur a ni bawk ang.
Nu leh pa te bakah chhungkaw member dang-te’n khuh, hrawk thip, taksa na them thum, khawsik leh chau nawih ngawih ang chi an neih chuan nausen hi an hlat ngei ngei tur a ni.
Covid kai hlauhawm lakah room leh a chhehvel hi thli/boruak lut leh chhuak thatna a ni tur a ni a, pawnah emaw thenawm te In ah te lenpui a, chhuahpui reng reng loh tur. Omicron hi inkai awlsam tak a nih avangin kawng hrang hranga fimkhur hle a tul.
Mithiamte sawi danin, nausen kha a khuh khet khet a, luak leh khawsik a neih chuan ngaihthah hauh loh tur a ni a, a rang thei ang berin Damdawi In pan nghal a tha ang. Mahni thu-a damdawi chawh a, rinthu-a lo enkawl ve ngawt hi a nausen tan a hlauhawm thei.
Tun thleng hi chuan hnute tui leh hnute pek atanga Covid-19 kai chhawn theih a nihna chiang tak sawi fak tur leh tanchhan tur a awm lem lova, nu berin hri a kai a nih chuan nausen hnute tui a pek hmâ in, doctor thurawn a la hmasa tur a ni ang.
Engpawhnise, nausen enkawl chungchangah nu leh pate’n a hnuaia tarlan te hi an vawng reng tur a ni:
Nausen bul hnaiah mask vuah thin tur a ni
Kut sil fai fo tur a ni ang
Vaccine lak ngei ngei tur a ni
Puipunna leh punkhawmna hmunah te nausen hruai loh tur
Dam lo hnaih bulah nausen dah loh tur a ni ang
In leng leh tlawhtu neih hi a him viau lo