Mizoram kickboxing team chuan National Kickboxing Championship an thunun hneh hle a. National record thar siamin player 11 kal atangin gold medal 10 leh bronze medal pakhat an la.
National championship hi December 28 atanga January 1 khan Rajasthan-ah neih a ni a. Mizoram team ah Nazareth Lalthazuala chuan Champion of Champions title a kawllai chu humhimin Ramdinthara, Pangzawl chu Best Player-ah thlan a ni a. Mizoram hian Best Discipline lawmman an la bawk.
December 23 a inel tura Mizoram chhuahsan Mizoram team-ah hian official pathum – Lalhlimpuia, manager leh coach Lalruatsanga bakah Rebecca Malsawmtluangi, national referee & judge te an awm.
Champion of Champions
Kickboxing inelna a ngaihhlut Champion of Champions title hi kum 2019 a Siliguri a Championship hi neihin Zemabawk tlangval Nazareth Lalthazuala hian a la tawh a. He title hi a la humhim thei a ni.
Champion of Champions zawn dan hi inelna huang a then hran a ni lova, open inelna niin a cho apiang an inhmachhawn a. Title inchuh dan rorum takah Mizo tlarngval hian a khingpuite knockout vekin a hneh.
Mizo fighter-te che tha
Ring chhunga tawnhriat la nei lo, Junior level-a full contract fight nei tura kal Zemabawk rawlthar Benjamin Lalrindika chuan final-ah a khingpui first round-ah technical knockout in a hneh nghal.
Best fighter a thlan tak Ramdinthara hi boxing-ah national level inelna lo hmachhawn tawh a ni a. Kickboxing-ah inletin ring chhunga a che a mawi thin a. Gold medal a lak bakah fighter tha ber a thlan a ni.
Bawngkawn fighter Isaac Lalhriatpuia’n K-1 ah khelin kum 26 chhunga knockout rang ber record a siam a. Second 8 chhungin hnehna a chang.
Leitan atanga kal Lalremruata’n a rilru huaisenna leh tawrhchhelna a chakpui a. A ban vawithum dawkin hliam a nei a, a inhliam avangin referee in disqualify mai a hnaih thu an hrilh hnuah a khingpui knockout in a hneh.
National leh state level a record nei tha Zemabawk North fighter JH Rosangpuia’n national huap a a gold medal pathumna a la.
Vanromawia, Muana In Boys Home, Salem Veng chuan ‘point fight’-ah gold medal a la a, gold medal inchuhnaah a khingpui a thunun hneh hle.
Mizo nulate an duai lo
Hmeichhe lamah Zemabawk nula Malsawmsangi’n final-ah a khingpui Kerala mi first round-ah a knockout a. National huap inelnaah medal 9 la tawhin gold medal pasarih a nei tawh.
Mizo fighter zinga hmabak nei eng R. Vanlalruati, Zemabawk in a kut leh ke rang leh fing taka hmang thiam hle in gold medal a la a. National level-ah gold 5 a la tawh.
Serte atanga fighter beiseiawm Catherine Lalluahpuii’n ‘point fight’ ah a khingpui a hneh zo lova, mahse bronze medal a la tho.
Kum 13 mi Zodinsangi, Falkawn chuan sub-junior ah ‘point fight’ khelin gold medal a la.