Tun hnaia Mizoram sorkarin officer te awmna hmun a siksawi avanga inhnialna boruak sang tak a chhuah mek karah Kolasib district chhunga pawl hrang hrangin an district bawrhsap insawn tur timuangchang tura chief minister ngen an tum.
Sorkarin MCS officer 12 a sawn zingah Kolasib district Bawrhsap Dr. H. Lalthlangliana chu school education department director ni tura sawn tel a ni a. Bawrhsap sawn chhuah chungchangah hian Inrinni zan khan Kolasib All NGO Coordination Committee chu inhmukhawmin bawrhsap sawnna thupek chu sut kher lovin, sorkarin muangchang zawka a kalpui theih nan Chief Minister Zoramthanga leh Dy. CM Tawnluia te hnenah thlen an rel.
Kolasib All NGO Coordination Committee chuan Kolasib bawrhsap Dr. H. Lalthlangliana chu ramri buai chungchangah leh Covid-19 leng dona kawngah hna thawk tha leh ram leh hnam tana hna tangkai tak thawk mek a nih avangin tun dinhmunah chuan sawn rih lo turin Zoramthanga leh Tawnluia te hnenah ziaka thlen nise, an ti a. An thurel bawhzui turin vawiinah chief minister hmu turin All NGO Coordination Committee aiawhte chu Aizawlah an kal dawn.
Thudawn danin, Chief Minister Zoramthanga hian Kolasib All NGO hruaitute hi inkawm turin hun pawh a pe tawh nghe nghe a ni.