Myanmar atanga raltlan tun dinhmunah Thingsaiah mi 355 an awm mek a. Heng raltlante hi camp pathumah dah an ni.
January 15, 2022 khan thu thar thehdarhtute chuan Myanmar atanga raltlan tamna khua, Thingsai an tlawh a. Raltlan awmkhawmna camp pathum zingah pakhat chauh tlawh niin, camp dang pahnihte erawh containment zone huam chhunga awm a nih avangin tlawh a ni lo.
Thingsai VC Secretary C Lalroluahpuia sawi danin January 4, 2022-a raltlan chhiarpui an neih hnuhnun bera an chhinchhiah danin mi 341 an awm a, hemi hnuah an la ziah luh loh mi 14 awm belh lehin, tun dinhmunah mi 355 an awm a. Raltlan zingah zirlai 124 an awm mek a. Heng raltlante hi Raltlan Relief & Management Committee-in buaipuiin, raltlan lut leh chhuak an awm thin avang hian thla tin raltlan chhiarpui neih thin a ni.
Nikum March thla tira fighter-in Lunglerh khua a bomb hnu lawk atangin Thingsai-ah hian Myanmar atanga raltlan an awm tan a. Raltlan an neih tam ber tumin mi 904 an ni a. Raltlan zingah a tam zawk hi Lai tawng hmang an ni a. Raltlan zingah hian mitthi pahnih an awm tawh a, mitthi chhungte ngenna angin Thingsai-ah phum ni loin, ruang hi |iau kamah mitthi chhungte hnenah hlan an ni.
Ei leh bara chhawmdawlna kawngah raltlante tan a bikin ration card siamsak an ni a, chawlhkar hnih danah ration buhfai, dal leh alu sem thin a ni a. Heng ration sem turte hi North Vanlaiphai leh Hnahthial atangtea an lakkhawm thin thu raltlan buaipuituten thu thar thehdarhtute an hrilh.
Thingsaia raltlan buaipuitute chuan, raltlante hi a theih dan anga an eizawnna tur dapsak an nih thu leh an duh a nih chuan lo number-te an pawhtir thin thu an sawi a. Raltlan tam zawk hi inhlawhna nei lo an nih avangin Thingsai VC leh khawtlangin khaw chhunga inhlawhna a awminduhsak bik an nih thin thu an sawi a. “Raltlan Relief & Management Committee hriatpuinain buh seng tur leh tul dang avangin raltlan thenkhatte chu haw zawk an nei thin a. An haw pawhin khua lut loin buh an sengna hmun tur an pan ding nghal thin a. Buh an seng zawhah an rawn let leh mai thin,” C Lalroluahpuia hian a ti a; raltlan zingah Mizorama awm nghet duh chhungkua 30 vel an awm thu a sawi.
Hetih lai hian, raltlan zingah khawtlang tanpuina leh chhawmdawlna mamawh lem lo, foreign-a awm an chhungte’n an rawn ngaihven a, an chhawmdawl leh tanpuina an thawn thin an awm nual bawk.
Thingsai VC Secretary chuan, Myanmar nena insumdawn tawnna border trade chungchangah hian sorkar hian tun ai nasa zawkin ngaihven se an duh tih sawiin, “Tun aia mumal zawka border trade kalpui turin sorkar hian a rawn ngaihven a, ruahmanna tha leh mumal tak siam se kan duh hle,” a ti a; Myanmar atanga ruihhlo tawlh luhna kawng zau tak a inhawn avangin, venhimna kawngah pawh tun aia changtlung zawka Police station te siam a, thawktute indaih lohnaah te thuam chak an mamawh thu a sawi bawk.
“Raltlante chhawmdawl tur hian sum leh pai, silh leh fen bakah ei leh in tur indap chawp a ngai tak meuh thin. Mi rethei tak tak te an nih avangin a hautak thei hle. Chutih laiin, kan chanchin hriaa pawl, kohhran leh mi mal ang te, ram pawn atanga tanpuina rawn thawh khawm thintute hnenah lawmthu kan sawi a ni,” C Lalroluahpuia’n a ti.
Khawhri khuaa fahrah enkawlna hmun, Peniel Children’s Home pawh thu thar thehdarhtuten tlawh bawkin, he home-ah hian kum li 18 inkar fahrah naupang 22 enkawl mek an ni.