Mizoramah kum 15-17 inkarte tana Covid-19 vaccine pek tur zat atanga za zelah 51 pek a ni tawh.
State Task Force on Immunization Chairman R. Lalramnghaka, Health Secretary hoa Directorate of Health & Medical Education (DHME), Conference Hall, MINECO-a thutkhawma nimina tar lan a nih danin, kum 15-17 inkarte Covid-19 vaccine Covaxin pek mek zel niin, January 16, 2022 thleng khan dose khatna hi 33,849 pek a ni tawh a. Hei hi pek tur zat atanga za zelah 51 a ni.
Kum 18 leh a chung lamah dose khatna 7,40,326 pek a ni tawh a, hei hi pek tur zat atanga za-a 96 a ni a; dose hnihna hi 6,03,941 pek tawh niin, hei hi pek tur zat atanga za-a 78 a nih thu thutkhawmah hian tar lan a ni bawk.
Mizoram leh India ram pumah zeng hri hi umbo ni tawh mah se ram thenawm Pakistan leh Afghanistan-ah te a la awm avang leh inkaihdarh a awlsam em avangin naupang kum 5 hnuailam te chu Zenghri danna (OPV Vaccine) pek vek tura tih an nih thu an sawi a. Pulse Polio Immunization (zeng hri danna) beihpui hi March 1-3, 2022 chhunga nei turin an ruahman nghal.
Naupang kum hnih hnuai lam leh nu naupai ten a hun dik takah hri danna an lak theih nan, Intensified Mission Indradanush 4.0 chu February 7, 2022 atanga beihpui thlak tan tura rel a ni. Hri danna an dawn tur ang la dawng lo naupang kum 7 hnuailam an awm chuan a tul anga pek zel tura rel a ni bawk.