HMEICHHE HUANG
Omicron hrileng karah nau i pai em?
- Robert Zoliana
Omicron hi kai awlsam tak a nih rualin, mi tam zawk chuan natna lanchhuah dan nasa lem lo an nei hlauh. Mahse, ngaihthah ngam chi erawh a ni hauh lo. A bik takin, naupai lai tan hripui hlauhawmna a ngai reng a, thihna hial awlsam tak thlen thei a la ni reng tih hriat a tha.
Omicron kai te zingah hrawk thip, khuh, taksa na them thum, khawsik, hri-tlang, hahchhiau leh chau ngawih ngawih te hmuh tur a awm a. Luak, luakchhuak leh chaw ei tui lo te pawh hri tharah hian hmuh theih a ni bawk.
Naupai te hi hripui vanga insawiselna nasa tak nei thei dinhmunah an ding tlat mai a, chhul a nausen thanlen zel dan turah te thlengin nghawng tha lo a thlen thei.
Engpawhnise, heng te hi hriatreng a, a taka zawm ngei ni se a tha ang:
Ei leh in tha la lut la, zan lamah tui taka mut tum ang che. Nau pai hian taksain natna a do theihna a ti-hniam thei a, allergy neuh neuh leh infection dangte pawh inzep tel thei reng a nih avangin fimkhur lehzual a ngai. Immune system tichak thei tur ei leh in hrisel tha la lut la; mawm, thak leh junk food ang chi te, um, leh thil tharhlam lem lo chi reng reng laka insum ngam tur a ni. A pawimawh ber chu mamawh tawk chawlh hahdamna i neih a tul a, tui taka i muthilh theih a tul hle bawk ang.
Harhvang thei ang bera awm tur. Breathing exercise lak a tha. In lamah taksa ngam leh tlin tawka exer lak tur a ni a, stress leh anxiety laka himna tur atan yoga emaw meditation te pawh a sual lem lo. Chuap a chak theihna turin breathing exercise mawlh kha a pawimawh.
In leng neih loh ngam tur a ni a, dam lo leh insawisel thin te lakah fimkhur rawh. Puipunna leh thiltihhona ang chi ah te tel ngai suh ang che.
Nau i pai a, hri i kai a nih chuan rang taka mahnia in quarantine nghal tur a ni a, doctor thurawn la nghal ang che. I taksa lumna enfiah thin leh oxygen level te pawh nikhatah vawi 2-3 tal chik a tha. A bik takin, nangmah enkawl hnai thintu leh i pasal khan full vaccine an la fel tawh tur a ni ang.
Hmai leh ka chhung bakah hnar te khawih loh tur a ni a, furniture, kawngkhar leh thil dangte khawih lo hram thin bawk ang che.
Mask vuah tha la, midang-te nena kar hlata awm tur a ni a, kut silfai taima la, kut sanitize thin rawh
I mamawh leh tul zual tur damdawi te inring lawk vek thin la, insawiselna i neihin a rang thei ang bera doctor hrilh tur a ni.