Zoram Medical College (ZMC)-ah Covid-19 hri kai damlo enkawl an pung zel a. Tun dinhmunah hri thar, Omicron vanga damlo enkawlna tur, Intensive Care Unit (ICU) leh ward dah hran theih a la ni.
Zawhna chhangin Dr John Zohmingthanga, Director, ZMC chuan, “Tun hnaia hri kai rawn pung tharah hian ZMC-ah hri kai hmuh chhuah thar an rawn dah hnem leh deuh va, dam lo enkawl an pung hret a. Nikum December thla laihawl vel khan kan thawl deuh duak hman a, damlo enkawl pawh 200 hnuai lam ni thin kha tunah chuan 200 kan kai leh tawh,” tiin The Zozam Times a hrilh.
Dr Zohmingthanga chuan Covid-19 kai pung leh hret mah se hri thar, Omicron kaite leh Mizoram state pawn atanga rawn hawte enkawl bikna tur ICU leh ward erawh dah hran theih a la nih thu a sawi a. “Tun dinhmunah chuan kan la phang lutuk lo e,” a ti.
India ram pawn, a bik takin Singapore leh Dubai atanga rawn hawte hri kai palhte ZMC-in an enkawl thu leh heng hri kaite zingah natna lang chhuak nei lote chu an enkawl ren rawn hnuah sorkarin SOP a siam zulzuiin RT-PCR test-a negative result neite chu an chhuah leh nghal thin thu ZMC Director hian a sawi bawk.