Excise & Narcotics Department-in nimin khan rakzu thahnem tak an man a. Kumin January thla chhung (January 18, 2022 thleng) hian rakzu litre 4,588 an man tawh.
END hian Phunchawng leh a chhehvelah dan kalha zu siamna hmun thahnem tak zinga hmun thenkhat an luhchhuah a, rakzu litre 1500, zu bilh lai tin 1,000, dan bawhchhia mi pakhat man a nih bakah a hmunhma leh zu siamna bungbel thenkhat an tichhe bawk.
Hetih rual hian, Aizawl lam atanga lak, rakzu litre 341 chu Thenzawl – Lunglei Road, Serchhip district-ah END hian an man bawk.
Kumin January 18 thleng khan END hian rakzu litre 4,588; zu bilh lai tin 1,890; IMFL (750 ml) bottle 1,010; beer (500ml) can 1,158; BEDC litre 42; heroin gram 391; ganja kg 2.719; methamphetamine gram 203; alprazolam tablet 40 leh tramadol tablet 10 an man tawh a ni.
END hian tunlaia dan kalha rakzu siamtute’n zu siamna atan bawlhlo hlauhawm tak, mihring taksa peng pawimawh zual (vital organs) tichhe awlsam tak an hman thin avangin, zu in a hlauhawm thu an sawi a. Lungphu chawl, kal leh thin tha lo leh natna dang dang a thlen awlsam em avangin in lo hram turin mipuite an ngen a ni.