HMEICHHE HUANG
Nau pai i ni a, i hriattur pawimawh te
- Robert Zoliana
Nuin a pum chhungah nau a pai a nih chuan, amah chauha inngaihtuah thei a ni tawh lo tih hi a hriat hmasak phawt a ngai a.
Ei leh inah emaw, naute a pai hmaa a chin dan thin emaw, a hriselna a enkawl danah a ni emaw thil tam tak ngaihtuah hmasak tur a nei tih a inhriat phawt hi nau pai nuin a hriat a pawimawh.
Doctor thurawn angin
Nu tam tak hian thenawm khawveng te emaw, nau nei tawh thenkhatin emaw an lain an ngeih ang damdawi ei ve mai hi an ching a, hei hian pum chhunga a nu rin ang ring ve mai naute hriselna a ti thuamawp thei a. Doctor thurawn anga damdawi ei hi a him.
Zu leh Meizial
Hmeichhia zingah meizial heh tak, kuhva ei sen nasa thei ve tak, zu in ruk zauh zauh ching pawh an awm nual a. Hetiang mite tan hian nau pai lai an tih thinte hi bansan a, nghei hmak hi a pawimawh viau bawk. Thenkhat hi chuan doctor hnenah nau an pai lai pawha meizial zuk leh kuhva ei te hi doctor hnenah zep then an ching viau a, an nau pai tan a tha lo tih hre reng chung pawha bansan thei lo hi an awm chawk.
Chakna pai chaw
Mahni chauh inngaihtuah theih a ni tawh lo kan tih tawh kha. Nuin a nau pai tana chaw tha tur a ngaih pawimawh thiam a tul tawh a, mahni chak zawng ringawt ni tawh loin, hriselna atana chakna pai tam lam chaw ei hi a tih -chi khawp ang. Nuin nau a pai lai pawhin a paitu taksa chu a che ve reng a ni.
Awm mai mai loh
Taksa che thei lo khawpa hrisel loa, nau pai tih avanga taksa chawlh hahdam tir lutuk pawh hian pawina a thlen thei. Doctor thurawn kal pel si loa chet deuh reng hi naute tan a pawimawh a. Hah lutuk si loa exercise lak tam hi a tangkai fu. He’ng contact sports tih angte leh hna rum tak naute thawhpui erawh a tha ber lem chuang lo.
Tui In tam
Nau an pai lai phei chuan an mamawh hle.
Ha leh ka vawn fai
Chaw ei khamah emaw, zing thawh veleh emawa ha nawhfai tur a ni. Ha hni fai taka dah thin tur a ni bawk.
Chawlh hahdam
Hna rum lutuk thawh te leh hmun hla tak taka kala motor-a chuan hian intihkhawloh a thlen thei a, rai lai chuan indimdawih thiam a tangkai hle.
Chemical lam kalsan
Nu leh nau pai tana a him zawk nan chemical lam hi kalsan a tihchi khawp ang. Thil tihfaina’na thil siam te, rawng te, sum dumna te leh a dang dangte nena inchiahpiah loh a him.
A eng lam zawng thlir
Awlsam takin stress a thlen theih avangin pumpelh dan kawng zawn hram hram thiam pawh a tul hle a ni. Nau paiin enkawl a mamawh ang bawkin, a paitu nuin duat leh enkawl a mamawh tih hi hriat a tha hle bawk.