Mizorama tlawmngai pawl hrang hrang inzawmkhawm, NGO Coordination Committee-in Mizoram chhuahsana Tripura-a awm nghet tawh Tuikukte chu inthlanpui neih a nih leh hma ngeia electoral roll atanga paih an nih theih nana hma la turin Mizoram sorkar an ngen.
Nimin khan NGO Coordination Committee chu Central YMA Office-ah an thukhawm a, Tripura-a awm nghet tawh Bru-te Mizoram E/Roll atanga paih chungchang an sawiho va, pawl hrang hrang leh political party-ten E/Roll atanga Bru-te paih tura thuneitute nasa taka ngen tawh hnua Mizoram E/Roll thar bera telh an la ni chu an hrethiam lo tih an sawi hlawm.
He thutkhawma tel pawl hrang hrang aiawha thusawitute chuan Mizoram E/roll atanga Tuikukte paih chungchangah hian Mizoram sorkar chu a che chak tawk lo nia an ngaih thute an sawi hlawm a, sorkar chu nawr kal nasa a ngai nia a lan thute an sawi hlawm a ni.
NGO Coordination Committee thukhawm chuan January 16, 2020-a New Delhi-a Union Home Minister, Mizoram leh Tripura chief minister leh Tuikuk pawl hrang hrangten inremna an lo siam tawh anga Tripura-a Tuikukte awm hlen tura tih chu tihhlawhtlin thuai an duh.
He inremna anga Tripura-a Tuikukte an awm ngheh theihna tur leh inthlanpui neih a nih leh hma ngeia E/Roll atanga paih turin Mizoram sorkarin a ngen a, hemi chungchang hi chief minister leh home minister hnenah thlenin sawipui an tum.
NGO Coordination Committee thukhawm chuan resolution siamin Mizoram atanga anmahni duhthu ngeia Tripura-a tlan thla Bru zingah Mizorama rawn let leh duh an awm nia sawi chu tha a ti lo va, a remchang lovah an ngai tih an tar lang.
The Zozam Times zawhna chhangin NGO Coordination Committee chairman, Central YMA president ni bawk, R Lalngheta chuan pawl hrang hrang aiawh thukhawmin an duhnate chu state sorkar thuneitute hnenah an thlen ang a, awmzia a nei loh a nih chuan central lam thleng bawhzui zel an tum thu leh Tuikuk chungchanga buaina hi a tawp vat theih tawh nan na taka hmalak chhunzawm zel an tum thu a sawi.
Mizoram khua leh tui nihna nei, an duh thu reng avanga Tripura-a inbengbel ta Tuikuk zingah Mizorama vote nei 11,772 an awm a, Mamit district-ah tam berin mi 8,885 a ni a; Kolasib district-ah 1,979 leh Lunglei district-ah 908-ten vote an nei.