Serchhip bawrhsap thar Nazuk Kumar-i’n nimin khan Serchhip district MJA member te lengah sawmin, inhmelhriatna hun leh tul leh pawimawhte sawihona hun an hmang.
Nazuk Kumar chuan chanchinbumite chu sorkar mit leh beng leh mipuite hnena a chhia a tha tinreng thlentu an nih avanga an pawimawh thu sawiin, Serchhip district enkawlna kawng tinrenga thawhpuiah a sawm a. Thil thleng pawimawhte hrilh hriaa, bengvar thin turin a ngen.
Serchhip bawrhsap chuan Mizoram boruak muanawm tak chu nuam a tih thu leh sorkar leh tlawmngai pawl hrang hrangte thawhhona tha reng chu ropui a tih thu a sawi a. Mipui tichiai zawnga thu leng vak thin laka fihlim tur leh mipuite thudik hrilhtu nih tum tlat zel turin thuthar thehdarhtute chu a ngen bawk.
Serchhip district MJA president Kapliana Pachuau pawhin bawrhsap thar chu lenga a sawm avanga lawmthu hrilhin, Serchhip district hmasawnna atana a hnathawhnaah chanchinbumi ten tangkaina an nei a nih chuan tanpui an inhuam reng thu a hrilh ve bawk a ni.
Chanchinbumite chuan district chhunga hmasawnna hnathawh hrang hrang te fur ruahtui tlak hmaa chak taka thawh a nih theihna tura tanlak tul an tih thu bawrhsap chu an hrilh a. District hospital lian leh changtlung zawk Serchhipin a mamawh hle tawh nia an hriat thu an hrilh bawk.