E/Roll atangin Tuikukte paih hleih theih an la ni lo!?
Mizoram Electoral Roll 2022 tihchhuah tharah anmahni duhthu a Tripura a pemthla Tuikuk vote paih loh a la ni fo hi a mak a, NGO coordination committee chuan hmalak an tum thu an sawi a, sorkar nen hian engtinnge an indawr dawn tih chu hunin a la hril zel ang chu.
Thawhlehni khan NGO Coordination Committee chu Central YMA Office-ah an thukhawm a, Tripura-a awm nghet tawh Bru-te Mizoram E/Roll atanga paih chungchang an sawiho a ni. Pawl hrang hrang leh political party-ten E/Roll atanga Bru-te paih tura thuneitute nasa taka an ngen tawh hnua Mizoram E/Roll thar bera telh an la ni chu an hrethiam lo tih an sawi a, Mizoram E/roll atanga Tuikukte paih chungchangah hian Mizoram sorkar chu a che chak tawk lo nia an ngaih thute an sawi hlawm a, sorkar chu nawr kal nasat a ngai nia a lan thute an sawi hlawm a ni.
NGO Coordination Committee thukhawm chuan January 16, 2020-a New Delhi-a Union Home Minister, Mizoram leh Tripura chief minister leh Tuikuk pawl hrang hrangten inremna an lo siam tawh anga Tripura-a Tuikukte awm hlen tura tih chu tihhlawhtlin thuai an duh. An duhna hi sorkar hian engtinnge a chhan dawn a la hriat loh a, che muang anga an puhnaah hian engtinnge an insawifiah dawn tih chu mipui zawhna a ni leh bawk.
Heti tak maia kan duhna tihpuitlin a nih har hi chhan engemaw tak a awm ngeiin a rinawm a, sorkar hian hlauh nei lovin, mizo mipuite duh dan leh inremna awm tawh sa ang ngei hian huai takin hma la se la, tlawmngai pawlten na zawk a an nawr hma ngeiin E/Roll thar hi ennawnin, siamtha ngei bawk teh se.