- PL Liandinga
Mizoram hian buaipui kan nei reng reng ti ila a sual lovang. A changin Pathian thu kan buaipui a, a changin khawvel thil kan buaipui a. Kan thil buaipui hi buaipui awm tak a nihna te pawh a awm thin. A hunlai zelah mi tam tak rilru a chiah hneh a, tam takin an thatpui a, thatpui thawm awm lem lova tiltiak ta te pawh an awm.
Kum sawm vel kal ta khan Chiahpuamin Mizoram a tuam vak a. Chawlhkar hnih chhung leka pawisa dah pun vak dan awmin kan hria a, kan bawh ruih ruih a. Mi tam takin an chhiatphah a, din chhuahpui ta chu tlemte an ni lo thei lo. Khami atanga ding chhuak pawh kha awm se tu leh fate hnena an din chhuah nachhan sawi chu thil nuam lo ve tak a ni thei ang. Chiahpuam kha a awmdan han ngaihtuah pawhin a rapthlak tham hle mai a. Pawisa fai kha saiipah an khung a, an beng muk a, an pu lawp lawp a, an keuh chawrh chawrh lo thei lova. An ziahfel dan phung lah kha han en tur mumal awm mang lovin pawisa kha an inhlan chhawng nawk nawk a. Pawisa dahtute leh a enkawltute reng reng kha an phi chuk a ni ber mai. Pawisa kha chhawng hnih chhawng thumin an han inhlan chhawng a, mahse a tawp lamah khan engmah mumal awm hek lo, a chhawng tinah khan a enkawltuin chanvo an nei zel si a, pawisa dahtute pawisa chauh kha a inlumlet a, buai mai loh chu tihtur a awm ta lo a ni.
Chiahpuam hnuah hian Kelkang a lar leh chiam mai a. Kelkang lamah kan inawi chho mup mup a, a kal ve lo chu rual pawl pha lo kan ni titih mai a. Damna chang te, harh tharna chang te kan tam hle mai a, sawntlung lei ei pawh kan thahnem tham viau awm e. Hei hi chu thlarau lam thil a ni a, sawi thiam a har khawp mai.
Hei tunah tak hi chuan Kuhva rah kan buaipui leh ta hle mai a. He kuhva rah hi a mak angreng hle mai a, a aia thil thar chhuah hlu leh man man tham hi Mizoramin kan la hre lo ni hial awm a ni. Indonesia atangin Burma ramah a lo lut a, chuta tang chuan vairamah an hralh e an ti a. Indonesia atang hian kg khat engzah hisapin nge a rawn thlen theih ang a, Burma ram a paltlangnaah hian engzah nge an senso ang tih kan hre lova. Mizoram a lo thlen hnu a an sawngbawl dan han en vang vang hian an hralhna lamah hian an hralh man to a ngai awm hlein a lang. A phurhna tur motor kawng te an sial chawp thul, motor-a hlang kaitu leh hlang thlatute hian an hlawh hnem hle mai a. Chu chauh ni lovin chhiah pek a la ngai a. Chu chauh pawh ni lovin kawng lakah kudam te an sa thliah thluah mai a. Chung bakah chuan kawng laka an kal tlang theihna tura pawisa senso ngai pawh hi tam tham fe tur chu a ni.
An buaipui dan zawng zawng han en hian he kuhva rah aia man man sumdawnna hi a thlai emaw, a thei emaw ang zawng chuan a vang viau awm mang e a tih theih. Sumdawnna kalphung pangngaiah chuan fet tak leh inrenchem takin, kawngkal bi fel tak neiin company lian ten thil an ti a. Mahse he kuhva rah tlawm tak erawh hi chu a khukin an khukpui vut vut mai a. Kuhva rah hmanga sumdawngho lah chu lian tual tual ang maiin an thang chak an ti lehnghal a.
A kuhva sumdawnna ngau ngau piah lamah he thil hi dan lova Mizorama lakluh niin a lang a. Chu pawh a la ni lo, kan Mizoram sorkar chuan kan thar chhuah ni hauh lo he hmawmsawm hi kan thar chhuah angin lehkha a’n siamtir mauh mai a. Sorkar dan leh sorkar kalphung en chuan he thil hi ngaihtuah tham tak a ni. Sorkar meuhvin dawt chiang tak, thil lian tham takah a sawi ta tlat anga lang hi a mak a. Thil thleng khat tak a ni kan ti thei ang. A chhan pawh thildang ang ni lovin Mizoram khaw chhak lamah hian kuhva hi an ching lo hrim hrim tlat a. Kuhva chin theih lohna ram anga ngaih fel thlap a ni chung pawh a Mizoram sorkarin Tiau kam atanga kuhva phurh, Mizoram thar chhuah anga lehkha a siam ta tlat hi a mak a ni. Tute mau ru a neituten an va phawk a, an han chhuahchhal a, “Hetiang te a i tih mai a va mak ngai ve maw le?” an han ti a. A rutu chuan, “Nia, a mak khawp mai,” a ti ang vel kha kan ang viau.
Mizo mipui tam berin he kuhva chungchang hi kan pawm lo niin a lang a. A hrechiang leh mi pangngai chin chuan kan pawm lo vek ni hialin a lang. Chuti chung chuan Mizoram sorkar chuan Champhai D.C, Champhai District a sorkar hnathawk zinga lal ber leh hna thawk tha tak ni a mipuiin kan hriat chu kuhva avang ni ngeia rin loh theih lohvin a sawn ta lawp mai a. Amah sawn tur hian dan lova kuhva phurtu motor driver leh motor neitu pawl hrang hrang chuan Chief Minister-ah an ngen a. An ngenna an thehluh rual rualin ti ila a sual hial lovang, sorkar chuan Champhai D.C chu a sawn ta a. Chu chauh ni lovin Mizoram police chuan Mizoram kawng zim leh kawng tlem takah hian kuhva phurtu truck panga chu a man thei lo ta lehzel a. Kuhva phurh hi dan a ni tiin police emaw, Mizoram sorkar emawin tan a khawh hauh lova. Chuti chung chuan truck rit phur an man thei lova, Mizoram chhunga kuhva phurh tlang phalna lehkha (GST lakna), lehkha dawrawm zet si, mahse ngaihthah theih hauh si loh a siamsak duh tlat bawk si.
Kan awmdan hi, “Nia, a mak khawp mai!”