Chief Minister Zoramthanga chuan khawchhak lam atanga Mizorama dan lova kuhva tawlh chu a rang thei ang bera tihtawp a duh thu Central YMA hruaitute hmaah a sawi.
Nimin khan Central YMA President R Lalngheta leh OB dangten chief minister hi hmuin dan lova kuhva tawlh chungchang an sawipui leh a, tun hnaia CEC thukhawmin kuhva rah tawlh tihtawp a nih theih nana hmalak an tum dante leh hemi chungchang zirchianna an neih mek thute an hrilh.
Chief minister chuan dan lova kuhva tawlh chu a rang thei ang bera tihtawp a duh thu Central YMA hruaitute hi lo hrilhin, Central YMA-in zirchianna a kal pui mek chu lawmawm a tih thu leh hmalak dan tur rawtna an neih hunah theihtawpa bawhzui a tul thu a sawi a, kuhva chungchangah sorkar, political party leh NGO-te tanrual tul a tih thu a sawi bawk.
Central YMA hruaitute hian January 13 khan khawchhak atanga Mizoram kaltlanga dan lova kuhva rah tawlh chungchangah hian chief minister hi an lo hmuh tawh a, hemi tum hian Zoramthanga chuan dan lova kuhva rah tawlh luh tihtawp a nih theih nan sorkar laipuiah pawh theihtawp chhuah a tum thu Central YMA hruaitute hi a lo hrilh tawh bawk a ni.
Nikum kum tawpa Central YMA CEC thukhawm chuan dan lova kuhva rah sumdawnna kalpui mekah YMA hruaitute leh member-te inhnamhnawih lo turin a lo ngen tawh a, he sumdawnna hi tihtawp a nih theih nana hmalak an rel angin ram hruaitute hmuin, he thil tihtawp a nih theih nana hma la turin an ngen ta a ni.