Champhai bawrhsap sawnna sut tura Mizoram sorkar an phutah hlawhtlinna an hmuh loh avangin Champhaia NGO hrang hrang thukhawm chuan total bandh huaihawt leh Republic Day boycott an rel.
An hun tiam chhunga Mizoram sorkar atanga hlawhtlinna an neih tak loh avangin, nimin khan SYMA pisa, Tlangrawt-a Champhai district Jt. NGO thukhawm chuan Bawrhsap Maria CT Zuali sawn chhuak lo tura Mizoram sorkar an ngenna, vawiin thlenga tihhlawhtlin a la ni lo chu pawi an tih thu sawiin, sorkarin an thil phut a la tihhlawhtlin loh avangin January 21, 2022-ah Champhai khawpui chhunga dawr zawng zawng khar; January 24, 2022-ah kawng zawh huaihawt; January 25-ah sorkar pisa zawng zawng khar leh January 26-ah total bandh huaihawt leh Republic day boycott an rel a ni.
Champhai district Jt. NGO chuan Mizoram sorkar laka an thil ngiatte Champhai district mipui tan a ni tih hriaa hma lakpui turin an district chhunga MLA-te an phut tih an sawi a. An hmalakna hi DC sawn ngawr ngawr ni loin, dan loa thil titute leh dikna indona a nih avang leh dik lo taka sumdawngtute kuta khawtlang, ram leh hnam tlu lut mek chhanchhuahna tur a nih avangin Champhai district mipuite leh Mizo mipui zawng zawngte an hmalakna thlawp turin an sawm bawk.
January 13, 2022 khan Mizoram sorkarin Mizoram Civil Service (MCS) eng emaw zat a siksawi zingah Champhai bawrhsap ni lai, Maria CT Zuali chu FCS&CA/Planning & Prog. Implementation Additional Secretary nihna chelh turin a sawn a. Bawrhsap sawn a ni chu duh loin, sorkarin MCS siksawia notification a tihchhuah tuk, January 14-ah Champhaia NGO hrang hrangte inkokhawmin, thutkhawm hmanhmawh an nei.
He thutkhawm hmanhmawhah hian Champhai bawrhsap sawn a ni chu tha an tih loh thu leh, a rang thei ang bera sut turin Mizoram sorkar an phut a. January 18, 2022 ral hmaa sut a nih loh chuan hmalak zel dan tura ruahman angin kalpui an lo rel tawh a ni.
January 14, 2022 khan Champhai district Jt. NGO hian dan leh thupek dik taka kengkawh a, dik taka roreltu Champhai DC Maria CT Zuali chu Champhai district-in a mamawh lai taka Champhai a chhuahsan hi rem an tih loh thu leh, an pawm lohzia lantir nan transfer order copy hi an lo hal tawh bawk.