Meghalaya cabinet chuan kum tam tak chhung Assam nena an ramri buai chin felna tura state pahnihin committee an din pathumin rawtna an thlente chu an pawm.
Regional committee pathum dinah hian Assam leh Meghalaya aiawh an tel theuh a ni.
Committee-in inremna a awm theihna tura rawtna an neihte pawm a nih tak avang hian ministry of home affairs (MHA) hnenah a bawhzui tura thawn a ni ang.
Ramri buaina chungchanga thu thar lian tak an neih hi Meghalaya Chief Minister Conrad Sangma chuan Nilaini khan Shillong-a thuthar lakhawmtute a kawmnaah a sawi.
Hma lam an panna chu ‘chhinchhiahtlak’ a nih thu Sangma chuan a sawi a, “State pahnihte duh ang ve ve chu ngaih pawimawh niin vawi tam tak thukhawma sawiho a nih hnuah a tha ber hi a lo chhuak a ni,” a ti.
Meghalaya chief minister chuan Assam Chief Minister Himanta Biswa Sarma nen Ninganiah New Delhi kalin committee rawtnate chu Union Home Minister Amit Shah-a hnenah an hlan dawn tih a sawi.
“Keini chu a awpna lama thuneihna chauh kan nei a, ramri then hi chu sorkar laipui lam chan a ni,” a ti.
Thawhlehni khan Assam chief minister pawhin hmun 12-a an buaina neiha paruk chin fel hmasak tura an tihah inremna neiin inremna turin kawng zawh mek a nih thu a lo sawi ve tawh bawk a ni.