Health minister Dr R Lalthangliana’n Mizoram ta tur mobile RT-PCR van (I-Lab)-in Mizoram a thlen tawh thu sawiin, company engineer te pawhin an endik tawh thu a sawi.
Health minister chuan district tina chief medical officer (CMO) te COVID19 chungchanga nimina virtual meeting a neihpuinaah he thu hi a sawi a. Rokhawlhna a awm loh chuan vawiinah union minister for science & technology Dr Jitendra Singh-a’n mobile RT-PCR van (I-Lab) chu internet kaltlangin a vailiam dawn tih a sawi.
Dr R Lalthangliana chuan Mizorama COVID19 dinhmun tlangpui sawiin, thingtlang lamah COVID19 a darh nasa mek tih a sawi a. District tina CMO te chu hripui do kawnga theihtawp an chhuahnaah lawmthu hrilhin, hun engmawchen chu insanmar a la ngai leh dawn tih a hrilh a. Ruahmanna felfai tak nen awmze nei tura hmala tur leh thingtlang mipuite hnenah uar lehzuala hri leng laka himna tura inkaihhruainate leh hri kaite enkawl dan tur hriatthiam awl zawka zirtirna kalpui a tul thu a sawi bawk.
Virtual meeting-a tel Dr Lalbiakkima pawhin Aizawl khawpuia IMA member ten hri kaite an vil angin thingtlang lama hri kai te vil pha lo mahse, a theih ang anga inpuih dan ngaihtuah a nih thu a sawi a. Hri kai damlote chu mahni duh thua damdawi lo inchawh ngawt lo tura hrilh a pawimawh thu leh antibiotics phei chu doctor rawn lo chuan ei miah loh tur a nih thu a sawi bawk a ni.