Odisha chuan Nilaini khan Omicron variant kai leh kai loh rang zawka hmuh theihna khawl nia sawi, ‘OmiSure’ RT-PCR test kit chu a enchhin tan.
Covid-19 chi thar, inkai awlsam tak hmuh theihna khawl nia sawi, OmiSure hi Tata Medical & Diagnostics Ltd-in Indian Council of Medical Research (ICMR) nen tangkawpa an siam a ni.
January 10 khan Odisha sorkar chuan OmiSure kit hi nuai nga a chak lawk tawh a, India state zinga a hlawma he hmanraw chah hmasa ber a ni a. Tunah hian kit 30,000 an dawng tawh.
Thuneitute chuan OmiSure kit hian nasopharyngeal/oropharyngeal specimen-a Omicron awm chu RT-PCR khawl hmanga endik a nih laiin a hmu thei niin an sawi a. RT-PCR khawl ang chi zawng zawngah hman theih a ni.
“Enchhinna (trial run) hi kalpui mek a ni a. Hei hi a tak taka hman chhinna hmasa ber a ni a, Omicron kai hmuh tam a nih chuan district hrang hrangah thawn chhuah a ni ang,” tiin an state health services director Bijay Mohapatra chuan news agency PTI a hrilh.
Mohapatra chuan OmiSure hi Odisha-a Berhampur, Cuttack, Rourkela leh Bhubaneswar khawpuiah te bakah endik atanga Covid-19 kai hmuh chhuah tamna district-ah te hman a ni phawt dawn tih a sawi.
Sorkarin a chhinchhiah dan chuan Thawhlehnia endik zinga Sundargarh chu a kai hmuh zat bi, test positivity rate (TPR) sanna ber niin endik zinga 36.1% zetin hri an kai a. Khurda-in dawtin 31.1% a ni.
PTI-in a tar lan dan chuan Odisha-ah hian district 25 zet chu TPR 7.5% chung lam an nih avangin red zone-a la awm an ni.
December thlaa ram chhunga a kai hmuh tan, Omicron hi Odisha-ah a kai mi 202 hmuh tawh a ni a. January 7 khan an state-ah thihpui awm nghalin India ram puma Omicron vanga thi pahnihna a ni.
Hetih lai hian darkar 24 liam ta chhung khan Covid-19 kai hmuh chu a hma ni aia tamin mi 11,607 an ni a, mi 11,67,094-in an kai tawh a. Mi parukin thihpui leh hman bawkin mi 8,494 an thi tawh a. Thi thar zat hi thla thum zet hnua an tam leh ber tum a ni nghe nghe.
Omicron hi mi 8,209-in an kai tih hmuh chhuah a ni tawh a, mi 3,109 enkawl dam leh tawh niin enkawl mek mi 5,100 an la awm a. An kai a ni tih finfiah a la buaithlak rih avangin heng aia tam daih hi a tak takah chuan kai an awm rin a ni.