EDITORIAL 21/1/22


Champhai boruak a sang chho zel, engtinnge ni dawn?

Tun hnaia MCS post thenkhat siksawi kal zelah, Champhai DC a tel ve avangin thawm lian a awm chho zel a, dan lova kuhva tawlh luhna kawng a nih miau avangin Champhai DC hian nasa takin hma a la a, kuhva tawlhtute hnen atang ngeiin FIR thehluh khum a ni bawk. Dan dik lova thiltitute an huaisarna ramah thupetute zawk sawnchhuah zel an ni hian mi tam tak ngaihdan a siam a, lungawi lohna a thlen phah ta hial reng bawk a nih ber hi.
Champhai district Jt. NGO thukhawm chuan Bawrhsap Maria CT Zuali sawn chhuak lo tura Mizoram sorkar an ngenna, vawiin thlenga tihhlawhtlin a la ni lo chu pawi an tih thu sawiin, sorkarin an thil phut a la tihhlawhtlin loh avangin January 21, 2022-ah Champhai khawpui chhunga dawr zawng zawng khar; January 24, 2022-ah kawng zawh huaihawt; January 25-ah sorkar pisa zawng zawng khar leh January 26-ah total bandh huaihawt leh Republic day boycott an rel a, kal nat chhoh an tum hle bawk.
Kuhva rah tawlh hi a ngaimawhawm chho hle mai a, mi langsar leh thiltithei tak tak an inrawlh tih pawh a chiang chho hle. Sorkar hotu lawkte hian an hre ngei tawh bawk ang. Mahse, hmalakna em em a la awm thei lo hi a mak tawh zawk a, YMA hial inrawlh tawh mah se, hmasawnna erawh a la awm vak thei lo niin a lang.
Champhai district Jt. NGO te hian Mizoram sorkar laka an thil ngiatte Champhai district mipui tan a ni tih hriaa hma lakpui turin an district chhunga MLA-te an phut tih an sawi a. An hmalakna hi DC sawn ngawr ngawr ni loin, dan loa thil titute leh dikna indona a nih avang leh dik lo taka sumdawngtute kuta khawtlang, ram leh hnam tlu lut mek chhanchhuahna tur a nih avangin Champhai district mipuite leh Mizo mipui zawng zawngte an hmalakna thlawp turin an sawm bawk a; Mizo mipuite i tangrual mawlh ang u.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427