- Robert Zoliana
Mipa te hi chu mipa an nihna kawngah engemaw chen inven theihna leh inenkawl theih chin an nei a, social media lam thilah pawh hmeichhia te aiin an chan a tha zawk.
Hetih lai hian, hmeichhia te tan erawh inven tur leh ngaihtuah tur a tam hle thung. Fimkhur a ngai lehzual awm e. A hnuaia tarlan te hi uluk takin chhiar rawh le.
Pianni leh hmun
I nihna dik tak (identity) rukbo nan a remchâng hle a, security chungchanga zawhnaah emaw password lak-chhuahnan kawng zau tak i hawn sak thei tihna a ni a, detail takin dah lo la.
Chenna
Hei pawh hi i nihna dik tak pholanna tha em em a ni thei a, rukruk hmang leh In rawk hmangte bakah, mi zui ruk chingte tlangnel taka siamna a ni thei.
Chawlh (holiday)
Facebook-ah, “Karleh zirtawp hi lo thleng thuai thuai se, Ka zin dawn a” tihte lo dah ta ang la, misual bengah chuan, “Lo kal la, kan In hi rawn ‘rawk’ ang che” tihna a ni thei. Plan tarlan thawt thawt a chi loh.
Thlalak mâwi chiah lo
Mi rilru ti nâ/hliam/hreh-awm thei tur ang chi reng reng dah loh a tha. A chhan chu, hnathawhnaa in pu/pi te leh i hna zawnna tura awmte’n Facebook an en nasat tawh em vang a ni.
Inpuanna
Hei hian i damchhung atan hrehawm tam tak a thlen thei che a, i thihni thlengin a tibuai thui viau thei bawk che. Tu nge i zui a, tu nge i tawmpui adt. tih ang chite hi a him lo hul hual.
Phone number
I thian tha hnai vai, i hriat-chian ngawih ngawihte tan a tul hle nia i hriat loh chuan phone number hi tarlan reng reng loh tur.
Bialpa nena lakdun
Hetah hi chuan zawnglai i la ni a, tuna i bialpa kha i nei ngei ngei dawn tih chianna engmah a awm lova, hmalam hun sawi thei i ni lo bawk. Inhmuh tui loh te hi thil thleng thei a ni si a.