Cheng nuai 820 senga sak Directorate of Health Services Building chu nimin khan Health Minister Dr R Lalthangliana’n a hawng.
Hemi puala inkhawm buatsaihah health minister chuan Covid-19 boruak rit tak karah health department-in hma a sawn zel a, Ayush department tan building sak vat a ni dawn tih a sawi.
District parukah hospital tihchangtlun a ni dawn a, chung zinga district pathumah khum 50 awmna leh district pathum dangah khum 50 aia tam awmna buatsaih a ni dawn tih a sawi a, sorkar laipui ministry nen pawn inbepawpin chak taka hmalak mek a nih thute, state matching share ngai loin heng hmasawnna hrang hrangte hi neih a ni dawn a, thawktute hlawh bakah a chhung cheina tur an rawn tum vek tur thu a sawi.
Khualzahawm Health & Family Welfare Development Board Vice Chairman Dr. Z.R Thiamsanga chuan pawhin thu sawiin, health department tan laknain Maternal Mortality Rate pawh Mizoram chhungah a hniam zawngin a kal chu hmasawnna a ni tak zet a, Nunna chhanhim hi department-in a tum bul ber a ni tih sawiin, hemi kawnga tan la zual zel turin thawktute a chah bawk.
Directorate of Health Services Building hi Infant Mortality Rate hniam avanga 13th Finance Commission atanga pawisa state sorkarin a dawn atangin leh CSS atanga kum 2016 – 2017 inkar leh kum 2019 – 2020 inkar a sum hmuh belh khawma sak a ni a, a vaia sum hmuh chu cheng nuai 820 a ni.
TBL Architectural Consultants, Khatla Aizawlin a sak hna hi August 8, 2017 khan an tan a. August 8, 2020-a zawh fel tura beisei a nih laiin, Covid-19 avangin duh angin hna a chak hleithei lo a, December 20, 2021 khan zawh a ni ta a ni.