- Lallunghnema, Charity Lodge
Consumer Huang chhiartu zawng zawngte chibai ka buk a che u.
Mizoram buai laia sephung lai rual keini ang tan chuan tunlai internet khawvel pen ruala pen ve tum chu thil hautak a ni chiang kher mai! Article ka ziah tan tirh te kha chuan article kha Editorte hnenah khan kut ziaka pek mai ka ching thin a. Type writter ka nei ve nain article puah em tur chuan ka inring zo si lova. Kut ziak article thawn ka ngah thin khawp mai. A chang chuan pawisa chawiin ka chhuttir fo bawk. Khang hun lai khan kut ziak leh chhut chhuah (hard copy) kan uar hle. Hun a lo kal zel a, pendrive-in article kan thawn a,tunah erawh, pdf leh whatsApp kan che lek leh ta hle a nih hi. Technology thar a lo chhuak zel a. Inzir a ngai chho zel. Kei ve tak ngial pawh hian,ka ti buk buk a, ka inham tang ve ta zel a nih hi! Ka mobile phone-ah hian thu ka chhu ve ta tluk tluk mai! Kut zungtang lianpui hmang ngeia hawrawp te tak te te han chhut dik chu harsa tak a ni. Mahse, ka thei tlat! ‘Nothing is impossible,’ ka ti hial. Ka article tam zawk hi mobile phone a ka chhut leh buatsaih a ni.
Kum 20 chuang fe a lo vei meuh chuan television kan iai tan ta! YouTube channel kan lek lam ta! Kum kal ta lama ka lo mangphan ve thin, Consumer-te puala Youtube Channel siam chu ka puitlin ve ta der mai! Eng tak ang zel dawn maw le?
He Channel hi Thil leitu leh hmangtute (Consumerte) dikna leh chanvo humhalh nana inzirirna a ni dawn a, a pawimawhin a tangkai hle dawn a ni. Mi tam takin lo enin lo ngaithla se, chhungkua leh mi maltinin lo tangkaipui se, tih hi ka duh thusam a ni. Heng ka duhthusamte hi a thena zar tal lo hlawhtling se, ka a va lawm dawn em?
Mahni dikna leh chanvo pawh hre lo nih hi a zahthlak a, bansan vang vang tur a ni. Kawng thenkhata hmasawn viau si, thil eng eng emawa changkang inti viau si, kan innghahna Dan kan han hre lo lutuk phiang sen thin hi chu a lungchhiatthlak zawk ngawt mai. Mizote hi thil lei huai tak, mi tha leh zung (service) lei leh hman awlsam tak kan ni a. Engmah hi kan chik peih lova kan bel chiang peih hek lo. Ram hruaitu zingah helama intat hriam ka hre lo hle. Chutiangin Officer zingah mi hriam hreih hrawih hmuh tur an vang hle a ni. Kohhran hruaitu tam zawk leh NGO hruaitu zingah ui hum pawh zat lovin heng essential service Kawlphetha, tui, gas, rawsawt etc rel bawl dan leh zeizia (rules,mannual) te hi an hre ve chang chang chauh mai thei zu nia maw le! Heng thilahte hian kan la bil hle a ni. Ka va sawi zing em!
He ka Channel-ah hian e, in chhungkaw mamawh chi hrang hrang leh Consumer right leh a kaihhnawihte ka sawi dawn a. Consumer Commission-te Thubuai rem chi hrang hrangte sawi ka tum bawk ang. Consumer Affairs Deptt. hotute leh thawktute ka kawm thin bawk dawn a ni.
Nangni thil leitu leh hmangtute u, chanvo leh dikna ropui tak in nei asin! Thil in hriat loh luatah in tuarnate chu chhel takin in lo tuar chhuak tawh thin a. Nitin rilru hliam tuar reng rengin hun in khawhral thin a nih hi! Chung in tuarna leh sal tanna atanga chhan chhuak tur che u in YouTube Channel kan buatsaih a ni a. Nitin mamawh hlui kan tum a ni. Ngaithlak man hla taka buatsaih kan tum a, Consumerte dinhmun tidanglam dawrh khawpin kan bei dawn a ni. Kan Channel. hming hi’Consumer- te chanvo hriatna,’ a ni a. Thupui then hrang hrang neiin hun hman tum a ni.
Buk tling,Tehfung dik
Taksa tana hrisel leh tha
Thianghlim leh him,
Ei tur leh in tur bawlhhlawh kai lo
Khawl chhe mai lo tur
Lei la,
Buk tling lo leh
Tehfung dik lo,
Hrisel lo leh
Bungraw belh chian dawl lo
Lei suh!
Bungraw lemte hek lei suh!
I thil leinaa harsatna i tawh chuan Consumer Activist-te leh consumer association hruaitute hnenah i thlen dawn nia. Heng ho hian an lo tanpui thei ang che. Tin, he kan Channel neitu hian a lo pui thei ang che.
Eng pawh ni se, ‘Consumer-te dikna leh chanvo hriatna,’ Channel hi lo subscribe phawt mai la, thil tha ti i ni ang a, midang tana malsawmna i lo ni ang. A hlawkpuitu tur chu nangmah bawk i lo ni ang. Tun atan chuan tawk lo chungin lo tawk tawh mai rawh se.
‘Kar leh lamah kan thu leh hlate hmangin kan intawng leh dawn nia!
Keiin ka ziak a,
Nangin i lo chhiar a,
Tangkaipuitu pawh
Nang leh kei kan ni!