Inrinna tlangkang avanga tsunami thlengin chhiatna a thlenna hmun, Tonga-ah chuan khawvel sorkar hrang hrangten lawng leh thlawhna hmangin puihna an thawn lut mek zel.
Tuipuia tlangkang hian Pacific pumah tsunami siamin Tonga bikah hian mi pathum vel an thi.
Chhiatna dang tam tak thlenin inbiakpawhna pawh a tichhe nasa a, tun thlengin eng ang chiahin nge chhiatna hi a thlen hriat kim theih a la ni lo.
New Zealand lawng lian, mamawh tam tak phur chu Zirtawpni khan thleng hman tura beisei a ni.
HMNZS Aotearoa captain chuan a hmain tui litre 2,50,000 leh mamawh dang an phuh thu Reuters a lo hrilh tawh a. UN chuan tui thianghlimin tuna Tonga-in an mamawh ber a nih thu a sawi.
Australia pawhin an lawng lian ber, HMAS Adelaide tirin Zirtawpni khan an chhuak a. Helicopter pawh phur telin Tonga-a thliarkar tenau zawka mamawhte pawh pe thei tura tih a ni a, karleh lamah an thlen rin a ni.
UK pawhin HMS Spey chu Tongan-te tan an peih thu leh Australian ship hmangin mamawh an thawn nual thu a sawi.
“UK chu Australia leh New Zealand nen inbe zelin Commonwealth-a an zawmpui hi a ngaihven reng a ni,” tiin UK Defence Minister Ben Wallace chuan a sawi.
Tonga-ah hian chhiatna a thlen veleh ram dangte hian an pui mai thei lo va, tlangkang khu leh meivap tam lutuk avangin an lut thei lo.
An thliarkar lian ber, Tongatapu-a thlawhna tlankawng chu mahnia inpeten thianin thlawhna pawh a tum thei ta chauh a ni.
New Zealand leh Australia atanga thlawhna hmasa pahnih chu Ningani khan a tum tawh a; tui, tui tihthianghlimna hmanrua, damdawi, puan in leh inbiakpawhna hmanruate an luhpui.
Tonga hi Covid-19 tihbuai loh an la nih avangin mihring intawk lo zelin puihna sem pawh kalpui a ni a. Ram dang atanga hri a luh an hlau hle.
Lawng sipaite lawng tirh mekten puihna hmanraw tam zawk an thlenpui thuai beisei a ni.
Puituten Tonga an thlen atang hian inbiakpawhna chhia pawh a tahtawla tihthat zel a ni a. Nilaini thleng kha chuan ram danga an ram mi awmten an chhungte chanchin pawh an hre thei lo a ni.
Tonga-in khawthlang lama an hnaih ber pahnih, New Zealand leh Australia chu puihna thawn lut hmasa leh a bultumtu an ni a. Anni bakah hian China leh Japan pawhin an thawn.
Japan hian an sipai thlawhnate chu Ningani khan tirh chhuah turin an buatsaih.
China pawhin $1,00,000 bakah mamawh zualpui an thawn tawh bawk.
“Hma lam panin, China hian Tongo-in an mamawh ang zelin sum leh bungrua pek zel a ni ang,” tiin foreign ministry thupuangtu, Zhao Lijian chuan Ningani khan Beijing-ah a sawi.
Tonga hi Pacific thliarkar pawimawh tak niin China hian sum a puktir bakah a pui nasa hle a. Australia dawta pui nasa ber niin mi thiamte chuan an sawi.
Tun kar tir pawh khan Australian prime minister hlui, Kevin Rudd chuan, “Australia hi Tonga puitu hmasa leh pawimawh ber tur a ni a, mi dang an tel a nih chuan China a ni mai,” tiin Twitter-ah a tar lang a ni.