New Zealand Prime Minister Jacinda Ardern chuan Covid-19 inkhuahkhirhna kalpui thar leh avangin a pasal neih tur a thulh leh rih.
Thliarkar ramah hian Omicron variant a darh chak mek avangin inkhuahkhirhna an kalpui thina a sang ber an kalpui thar leh mek.
Inkhuahkhirhna tharah hian invenna la tawh pawh ni sela, thiltih khawmnaah mi 100 aia tam awm khawm phal a ni lo va; dawr leh vantlang inkalpawhnaah hmai tuam vek tur a ni bawk.
New Zealand-ah hian tun thlengin Covid kai mi 15,104 awm tawhin mi 52 an thi tawh.
Ardern-i chuan Pathianni khan television host Clarke Gayford nena inkutsuih an tum chu an thulh tih a sawi a. Mi danglam ka ni bik lo va, New Zealander ve tho a nih angin dan zawmin, thiltih khawm huaihawt a tum ta lo tih a sawi.
Inkaihhruaina thar hi an rama Pathianni zan lai (India-a tlai dar 4:30) atangin hman tan a ni.
New Zealand-ah hian Omicron kai mi pakua an awm a. South Island-a chhungkua, Auckland khawpuia inneihnaa kal hawte chu hri an kai tih hmuh chhuah an ni, an thlawhna chuanna thawk pakhatin a kai bawk a. Thuneitute chuan heng mite atanga mi dangin an kai chiam chu a hlauhthawnawm hle tih an sawi.
In chhung leh thiltih khawmnaah invenna la tawh mi 100 aia tam awm phal a ni lo va, invenna la lo phei chu mi 25 chauh awm phal a ni a. Hei hian gym leh inneih inkhawm pawh a huam tih New Zealand Herald chanchinbu chuan a tar lang.
Zirlai kum li chung lam chu an sikulah hmai tuam tura tih an ni.
New Zealand hi hripui lengah hian inkhuahkhirhna hmang tan hma niin thi pawh an tlem phah hle a. Ramri khar hmasa pawl leh inkharkhip kalpui hma pawl an ni.
Delta variant hnuah erawh Ardern-i sorkar chuan inkhuahkhirh vaka Covid um bo tum aiin invenna peka a kaite enkawl chak lam a buaipui tawh zawk.
An ram mipui kum 12 chin chung lam 94% chuan invenna an la kim tawh a, 56% phei chuan booster dose an la tawh.