Champhai Bawrhsap Maria CT Zuali sawn chhuahna thupek sut tura Mizoram sorkar kar nan Champhai khawpui chhungah vawiin hian Champhai district NGO Coordination Committee ruahman angin ‘Dikna Tun din Kawngzawh’ huaihawt a ni dawn.
January 19, 2022-a an thu relte bawhzuiin, Champhai district NGO Coordination Committee chuan an ruahman lawk ang zela hmala turin vawiin chawhma dar 11 hian Champhai khawpuiah ‘Dikna Tun din Kawngzawh’ huaihawt chhunzawm an tum a. “Champhai mai pawh ni lo, Mizoram tana ke pen duh chu an lo chhuak mai turah kan ngai,” tiin NGO Coordination Committee hruaitute chuan The Zozam Times an hrilh.
Hetih lai hian bawrhsap sawn chhuahna thupek sut tura Mizoram sorkar kara an hmalaknaah, Champhai District NGO Coordination Committee atangin Champhai Sub-Headquarter YMA tel tum tawh lo anga thawm awm chu official-a engmah an la hriat loh thu sawiin, “An hai deuh dawn nge maw ni kan ti. Mahse, tlangkam atanga kan hriat bak chu, official-in engmah kan la hre lo,” tiin, nimin tlai dar 5 vela The Zozam Times-in committee member zinga mi a biak chuan a sawi.
“Kan hmalaknaah Champhai Sub-Hqrs YMA hi lo inhnukdawk pawh nise, awmzia a awm lo ang. Mipui kan tangrual vek a. Coordination committee hi chuan kan ruahmanna angin hma kan la chhunzawm zel dawn a. Chutih laiin, Champhai Sub-Hqrs YMA nihna leh kan hmalaknaa an chanvote a nihna angin a kaltlang vek tho ang. An rawn kal lo a nih a, an chanvo an tihlawhtling lo a nih chuan anmahni thu a ni a, tih theih kan nei lo,” a ti bawk.
Champhai District NGO Coordination Committee hruaitute chuan bawrhsap sawn chhuahna thupek sut tura Mizoram sorkar kara hma an lo lak tawhnaah mipui thlawp an hlawh tha thin hle niin a sawi a. Hetih lai hian, tun thlengin Mizoram sorkarin an thu leh hla a la bengkhawn duh lo a, a la ngawi vung vung chu mak an tih thu sawiin, “Sorkar lam atangin dawhkan khat kila inbiak tumna a la awm lo a. India ram hun pawimawh, Republic Day hial thulhtir tura hma lak kan tumnaah pawh min la bengkhawn duh lo a nih chuan, engahmah min ngai lo angah kan ngai. Keini chuan hmalak dan tur kan rel zel ang,” an ti.
An thurelte bawhzuiin, Champhai Bawrhsap Maria CT Zuali sawn chhuahna thupek sut tura Mizoram sorkar kar nana an hmalakna hmasa berah, January 21, 2022 khan Champhai khawpui chhungah sumdawnna dawr zawng zawng kharin hma an la tawh a. Mipui thlawp a hlawh that em avangin nilenga dawr khar tura an ruahman chu, chhun dar 12 khan dawr khar an titawp a ni.
Champhai district NGO Coordination Committee-in naktuk, January 25 hian sorkar pisa zawng zawng khar an tum bakah, January 26 khian Republic day boycott-a total bandh huaihawt an tum leh a ni.