Auto Corner
by Ruata
Kia Carens
Thlaleha tlangzarh turin ruahman
Kia Motors chuan an lirthei thar tur Carens chu thla hmasa khan an lo phochhuak tawh a. Kia Carens hi February thlaah a chhuah beisei a ni a, khawvel pumah Indiaah an tlangzarh hmasa ber dawn a ni.
India ramah Kia lirthei pahnih lar tak, Mizoramah pawh kan hmuh nual tawh Kia Seltos leh Kia Sonet te kan lo hmu tawh a. Heng lirthei chhuak tawh pahnihte hi SUV huanga mi an ni a, Carens hi eng huangah chiah nge dah tur tih hi sawithiam a har a. SUV ni deuh si, MPV huanga dah theih si, a inkar vel te pawh ti ila a sual tam lo anga, MPV huanga mi Toyota Innova te ho nena inel tur a ni mah zawk ang chu.
Hei hi India ram market-a Kia lirthei pathumna tur a ni.
A len zawng
Kia Carens hi Creta/Seltos platform tihsei hret a ni dawn a, Hyundai Alcazar platform te nen pawh a inmil dawn a ni. Carens hi a sei zawng 4,540mm niin a vang hi 1,800mm a ni a. 1,700mm a sang niin a wheelbase hi 2,780mm a ni. Kia Seltos nena khaikhin chuan Carens hi 225mm in a sei zawk a, 80mm in a san zawk bakah a wheelbase hi 160mm a sei a ni.
Carens hi Alcazar aiin a seiin a sang zawk a, a vang zawng pawh a lian zawk thung a. Tuna Alcazar chhuak mek hi 4,500mm a sei, a vang 1,790mm, a san zang 1,675mm a ni veleh thung a ni. Alcazar wheelbase 2,760mm a thui ai pawhin a thui zawk bawk. Carens Toyota Innova Crysta aiin a wheelbase a sei zawk bawk a, a lirthei pum sei zawngah erawh Innova a sei zawk a ni. Carens len zawng han chhut vang vang hian lirthei chhung zau nuam tak tura duan a ni tih a lang thei awm e.
A pawn lam
Sawi tawh angin Multipurpose Vehicle (MPV) huanga mi lirthei design a ni a, hetihrual hian a design en hian a SUV riau bawk a ni. Split LED headlamp neiin 3D pattern awm grille mawi tak a nei bawk a. A hma bawrah hian Kia ho signature ‘Tiger Nose’ design chu a bumper bawrah a langchhuak bawk.
A lirthei landan tam takah hian Seltos design a mitthla tel theih a. A hnung kawngkhar hi an SUV chhuak tawh aiin a lian a, a tukverh velah pawh chrome garnish a hmuh theih bawk. A hnung lamah hian LED tail lamp, LED strip sin takin a thlunzawm a awm bawk a. A hnunglam windshield chungah hian spoiler a awm tel bawk a ni. A hnung bumper pawh a design a mawi viau a. A lirthei pian leh body cladding awm te hian a ti SUV riau bawk a ni.
A chhung lam
A chhunglamah chuan an hmanraw hman a changkang em em a, a dashboard leh thildang te hi a dak nalh hlarh mai a. Cab-forward design an tih, MPV tam takah kan hmuh hi a chhung dashboard design-ah pawh hian a hmuh theih bawk. A chhung rawng pawh hi a mawiin a thianghlim hle a, infotainment system rem takin a invuah thlap bawk a, a chhung hi a hmeh tur switch neuh neuh an duan dan te nen zawng zawng hian a dak nalhin a changkang hle.
A chunglamh hian AC vents mawi tak leh fel thlapin a lirthei vang zawngin dah a ni a. Touch-based panel with toggle switche, a climate control lam thununna tur te, ambient lighting panel mawi tak te a awm bawk a ni. Kia Carens hi 6- leh 7-seater a awm ang a, 6 seater bikah hian a lai tlarah captains seat a awm dawn bawk a ni.
A kentel tur
Kia Carens hian technology hmanraw changkang ken tel a ngah dawn viau a. Heng zingah hian 10.25-inch touchscreen infotainment system with Apple CarPlay, Android Auto & Kia UVO connect, fully digital instrument cluster, eight-speaker Bose sound system, multi-function steering wheel, audio controls button awm tel, voice command leh phone call hman theihna, Seltos leh Sonet-a awm ang a nei ang.
Heng bakah hian tarlan tawh roof-mounted AC vents bakah 64-colour ambient lighting, ventilated front seats, seat-back tables with cup holder, electrically powered one-touch tumble down feature (A tlar hnihnaa thute tan) leh air purifier te a nei dawn a. Himna lamah chuan airbag paruk, ABS, ESC, hill-start assist, a ke pali atan disc brake, TPMS leh rear parking sensors te a nei dawn a ni.
A khawl
Carens hian petrol leh diesel khawl a neih hmel a. 115hp power leh 144Nm torque pechhuak thei, 1.5-litre naturally aspirated petrol engine, 6-speed manual gearbox kengtel a nei ang a. 140hp power leh 242Nm torque pechhuak thei, 1.4-litre turbocharged petrol khawl, 6-speed manual leh 7-speed DCT gearbox nei a awm tel dawn bawk.
Heng bakah hian diesel engine-ah chuan, 1.5-litre khawl 115hp power leh 250Nm torque pechhuak thei, 6-speed manual leh 6-speed torque converter automatic gearbox duhthlan tur nei bawk a nei ang. Heng khawl te hi Seltos-a kan lo hmuh tawh ang an ni.
A man
Kia Carens hi Hyundai Alcazar te nena a man inang tura beisei a ni a. Rs Nuai 16 – 20 (ex-showroom) man inkar vel a nih beisei a ni a. Tlangzarh a nih hunah chuan MPV chhuak mek Maruti XL6 leh Toyota Innova Crysta inkar vela mi tur a nih hmel a. SUV thenkhat Hyundai Alcazar a milpui deuh, 6/7 seater SUV lian ho te nen pawh a inel tel thei bawk ang chu.