Mizoram chhunga hmunphiah huan neituten an hmuhphiah hralh turin engmah an chawi a ngai lo va; an duh duhna hmunah an hralh theih rualin, state pawna hralh tur chuan chawi an neih a ngai thung.
Tun lai hi hmunphiah keh hun a ni a. Hmunphiah tamna, Kolasib district-ah chuan khaw hrang hrangah hmunphiah leituten collection centre an siam a. Heng hmunah hian hmunphiah huan neitute leh a kektuten an hralh thin.
Tun dinhmunah Vairengte-ah kg khat Rs 40-45 vel a ni mek nia thudawn a ni.
Kolasib district hi hmunphiah that duhna ram a nih avangin mi tam takin hmunphiah huan siam chu eizawnna atan an hmang mek nia sawi a ni. Hei bakah hian kawngkam leh ramhnuai hmun hrang hranga hmunphiahte chu a duh duhin kekin, collection centre-ah hian an hralh thin nia sawi a ni bawk.
Mizoram sorkara forest dept chuan kum danga an tih ang bawkin heng hmunphiahte leikhawm hna thawk turin mahalder a thlang a, mahalder hian Mizoram sorkarah kg khat zelah royalty Rs 27 a chhung lut a ni.
DFO Kolasib Division chuan Kolasib district huam chhung ramhnuaia hmunphiah quintal 1,485 chu sorkarin a mahal tih sawiin, eizawnna atana mi mal hmunphiah huan siamte chu mahal-in a huam lo tih a sawi a. Anmahni huana mi ngei a nih chuan mi mal hmunphiah huan neitute chuan an duh duhna hmunah an hralh theih thu sawiin, state chhunga hralh turin pawisa chawi ngai a awm loh rualin state pawna hralh tur erawh chuan sorkar dan angin transit pass an pek a ngai a, hei vang hian administrative cost kg khat zelah Re 1 lak a ngaih thu a sawi bawk.