ADC te ngaihsaka, dawhkan kila inbiakna neihpui a tul
Mizoram sorkar chuan August, 2020 khan lal dan indawt, order of precedence tichhuakin, he lal dan indawtah hian district council lam hotute chu an lungawi lo hle a, siamtha turin Mizoram sorkar ngen thin mah se, vawiin thlengin siamthat a la ni lo thung.
Hetiang a nih tak avangin Autonomous District Council (ADC) pathum te chuan a hranin I-Day leh Republic Day pawh an hmang ta zel a, kumin Republic day pawh a hrana hman leh an tum bawk. Sorkar hian siamthat tumna a la nei lo zel a nih phei chuan an hmalakna hian eng chen tak daih chho ang i maw?
Inrinnia MADC hotute leh NGO aiawh thutkhawm kaihruaitu MADC Executive Secy K.Chhihrau chuan State danga ADC hruaitute chu Cabinet minister rank te, MoS rank-ah te dah an nih laia Mizoram state chhunga ADC Leader te rank hniam tete-a dah an ni ta mai chu hriatthiam harsa an tih thu sawiin, an lungawi lo takzet tih a sawi a, he order hi siam tha thuai turin sorkar an ngen nawn tih a sawi bawk.
Mizoram chhungah ADC pathum a awm a, anmahni bial chhungah na na na chuan an theihtawpin hma an la chho ve thin bawk. Mahnia inrelbawl chho ve an nih miau avangin anmahni awptu Mizoram sorkar hian an dinhmunte hi ngaihtuah nawnin, duat leh duhsak kawngah hma thar la thei se la, sorkar inthlak zawnga chet sek reng ringawt loh deuh hi ngaihtuahnaah nei thei se a tha hle.
Chutihrual erawh chuan ADC lam pawh hian dik tawk lohna leh famkim tawk lohna pawh an lo nei mai thei bawk a, ral atanga intawng tawn reng lo hian dawhkan kila inbiakna rah duhawm hi awm thei thuai bawk teh se.