Champhai Bawrhsap Maria CT Zuali sawnna thupek sut tura Mizoram sorkar an karna kal zelah Champhai District NGO Coordination Committee (NGO-CC) chuan Republic Day boycott an tum chu kaltlangpuia a lawmnaa kal turte dan an tum.
Nimin khan NGO-CC hruaitute hi action plan kalpui zel dan tur sawiin an thukhawm a. Champhai Bawrhsap Maria CT Zuali sawnna thupek Mizoram sorkarin a tihdanglamah Republic Day an post-a hmang tura tih a ni chu an thil phut nen inzawmna a neih loh thu an sawi a. Dikna tun din an duh tihlan nan sawnna thupek sut tura phut an nih thu an puang nawn leh.
NGO-CC hian Champhaia Republic Day 2022 lawmna boycott tura ruahmanna an lo siam lawk tawh chu kaltlangpui an tum thu sawiin, “Republic Day 2022 lawmna hi boycott tura kan lo rel tawh angin kan kaltlangpui dawn a. A hmuna va tihbuai lam ni loin, Republic Day lawmnaa kal turte hi dan kan tum a ni,” tiin NGO-CC Chairman Lalnunmawia’n The Zozam Times a hrilh.
January 26, 2022-a total bandh neih tura NGO-CC-in an ruahman tawh erawh chu thutkhawmah thulh rih nise tia an rel thu sawiin, “Sorkar kar nan, hun hmasa lamah Champhai khawpui chhunga sumdawnna dawr zawng zawng lo inkhartir tawh a. Total bandh kan kalpui leh chuan mipuiin kan tuar dawna kan hriat avangin total bandh chu pending hrih turin kan rel,” a ti.