Congress party Vigilance Cell chuan MNF sorkarin sikul 172 sak thatna tura NABARD sum Rs. nuai 3,500 an puk hmanga dik lo taka hnathawhte sawi fiah tur leh, hnathawh dik lo zawng zawngte a rang thei ang bera siam thattir leh turin Education Minister Lalchhandama Ralte an phut.
Aizawl Press Club-ah nimin khan thuthar thehdarhtute an kawm a. MPCC Vigilance Cell Chairman C. Ngunlianchunga chuan January 22, 2022 khan team thumah inthenin, Tuivawl (Education Minister Lalchhandama bial) chhunga MNF sorkarin NABARD sum Rs. nuai 3,500 an puk hmanga an hnathawhna school 15 tlawhin, thil dik lo tam tak an hmuh thu a sawi.
“School 15 kan tlawhte hi a nih dan tur ang taka sak leh khawih pakhatmah a awm lo a. School tina hna thawktute hian approved estimated amount aia nuai tam taka tlem vekin hna an thawk a. Estimated amount Rs. nuai 72.92 ho hi Rs. nuai 55 te, nuai 57 tein an thawk a, nuai 29.18 man pawh nuai 21 te, nuai 20-ten an thawk. Nuai 18.03 man hi nuai 12-in an thawk bawk,” C Ngunlianchunga’n a ti.
MPCC Vigilance Cell chairman chuan school repairing work Rs. nuai 8 leh nuai 10 manah takngial pawh estimate angin an thawk pha lo a, sensoah hian a tlangpuiin Rs 1,00,000 bak an sen a rinawm loh thu leh school thenkhatah phei chuan Rs 1,00,000 aia tlem hial pawh hman a nih a rinawm thu a sawi a. Approved estimated amount aia tlem zawk veka hna thawhtir an ni hi a thawktute ngei pawhin an hrethiam lo hle thu a sawi.
C Ngunlianchunga chuan hnathawh tam tak dik lo awm chung pawha completion certificate chu hotu sang lamin an pe chhuak thei chu, man tang eitu an awm tih a chian thu sawiin, “Heng hnathawhna tura dah pawisa nuai tam tak hi khawiah nge a awm tih hriat a ni lo a. A taka thawk miah lo thiltithei tak hnenah pawisa kawngbo thahnem tak a lut ngei niin a lang a. Hei hi sawi fiah ngei turin education minister kan phut a ni,” a ti.
“Central scheme atanga education department-in school sakna tur a hmuha a hmangtuten an duh a nih a an hmang tha lo deuh a nih pawhin thu dang a ni. Mahse, Mizoram sorkarin NABARD atangin loan-a school sakna tur a puk a ni. Hei hi Mizoram mipui leibaa lut tur a ni a, a pung nena rulh leh tur a ni,” a ti a. “Kan sum leh pai dinhmun kan hre vek a, sorkar hnathawhten a hun takah hlawh an la thei lo a. Mizoram sorkarin sum leh pai chungchangah nasa taka harsatna a tawh mek laia party worker-te insiam nan leh induhsak nan maia an hmang hi hriatthiam harsa kan ti a ni,” a ti bawk.
MPCC Vigilance Cell sawi dan, a tlangpuiin:
- DARLAWN HIGH SCHOOL -II (ADHOC) : Reconstruction niin estimated amount hi Rs. 72.92 lakh a ni a, tualchhunga thawktu MNF Party worker hi cheng nuai 55 a thawh tir a ni. Pawisa cheng nuai 17.92 hi a bo ta daih a, a awmna chin hriat a ni lo.
- GOVT. RATU HIGH SCHOOL : Repairing work niin estimated amount hi Rs. 8 lakh a ni. Headmaster Office tur sak a ni a, Staff bathroom sak a ni bawk.
- GOVT. RATU M/S-II : Reconstruction niin estimated amount hi Rs. 29.18 lakh a ni a, a thawktu tualchhung mi, MNF worker hi cheng nuai 21 a thawh tir a ni a, nuai 8.18 hi a awmna chin hriat a ni lo.
- NEW VERVEK MIDDLE SCHOOL : Reconstruction niin estimated amount hi Rs. 29.18 lakh a ni a, tualchhunga MNF worker pahnih hnenah cheng nuai 14+6 = 20 lakh in thawh tir an ni a, cheng nuai 9.18 a bo. Room pali sak tura tihah room pahnih chiah sak a ni a, office room thar sa lovin building hlui rin a ni bawk.
- SAKAWRDAI M/S – II : Construction of Addl. Classroom niin estimated amount hi 18.03 lakh a ni a, tualchhung mi, MNF worker hi cheng nuai 12 a thawh tir a ni, cheng nuai 6.03 a bo. Room pahnih siam tura tih a nih laiin room pakhatah khaikhawm a ni.
- VAITIN HIGH SCHOOL (Adhoc Aided) : Reconstruction of School building niin estimated amount hi Rs. 72.92 lakh a ni a, a hmuna thawktu MNF worker hi cheng nuai 57-a thawh tir niin cheng nuai 15.92 a bo.
- GOVT. THINGSAT P/S : Repair hna niin Thingsat estimated amount hi Rs. 10 lakh a ni a, school building pawn leh chhung rawng hnawih nial nual a ni a. A bang thing thlak hlek hlek mahse a bang mawih leh Sulrul in a ei kuak chhiat kaw hiau huaute thlak a ni lo thung. Plastering tih a ni lo a, ceiling siam a ni lo, Ventilation siam a ni lo bawk.
- GOVT. SAWLENG M/S : Repair hna niin estimates amount hi Rs. 10 lacs a ni. Tukverh leh Kawngkhar engmah thlak a ni lo a, tukverh Chokut thenkhat a tluan tling lova thlak a ni. Partition wall siam a ni lo a, plaster tura tihah a chhe zual lai feet 10 bial vel cement tuia luan a ni.
- DARLAWN HSS : Repairing work niin estimated amount hi Rs. 8 lacs a ni a, school building hmalam, mipuiin an hmuh mai theih chin zawng rawng hnawih a ni a, a dang hnawih a ni lo. School building rawng hnawih hi a hna neitu nia sawiin rawng bur litre 10 bur 8 a dah tawp a, mipuiin hnatlangin an thawk.
- GOVT. DARLAWN H/S : Repairing work niin estimated amount hi Rs. 8 lacs a ni. School building hmalam chiah plaster a, rawng hnawih a ni a, a hnung lam zawng plaster a nih loh bakah rawng hnawih a ni lo. Hetih lai hian zawhfel vek anga bill lak vek a ni thung.
- GOVT. PALSANG P/S : Reconstruction niin estimated amount hi Rs. 29.18 lacs a ni a, approved drawing-ah room 5, feet 59.4 tur anih laiin feet 45 chauha sak a ni. Chumi avang chuan approved drawing a staff room tur hi hmuh a ni ta lo a ni.
- GOVT. PALSANG P/S : Repairing work niin estimated amount hi Rs. 10 lakh a ni a, reconstruction atan Rs. 29.18 lakhs dah a ni bawk. A vaiin cheng nuai 39.18 zet dah a ni chungin an khawih tlem hle.
- GOVT. ZOHMUN M/S : Repairing work niin estimated amount hi Rs. 10 lakhs a ni a, kawngkhar 7 thlak a ni, partition wall siam a ni lo, a chung rangva a dung feet 120, a vang feet 24 siam a ni.
- ZOHMUN HSS : Repairing works niin estimated amount hi Rs. 8 lakhs a ni a, ceiling atan silpauline hman a ni bawk. Brick wall aiah skirting feet 50×2 zelin brick rem a ni a, a pawn lam rawng hnawih a ni. Tukverh siam a awm lo.
- GOVT. M/S KEPRAN : Repair tur niin estimated amount hi Rs. 10 lacs a ni. Tukverh leh ventilation thenkhat thlak a ni a, ceiling siam niin, rawng hnawih thar a ni a, godown feet 6 a extend niin thutthleng leh dawhkan chhia repair a ni bawk.