COVID-19 vangin khawvel ram hrang hrangin hmasawnna hna thawh a chak thei lo tiin chhuanlamah an hman mek laiin zirchianna thar chuan mihring dikna leh mipui rorelna palzut danchah kawngah tan lak a la ngai hle tih a sawi.
Transparency International-in kum tina a tihchhuah thin, Corruption Perceptions Index-ah ‘mihring dikna chanvo leh mipui rorelna chu nasa taka palzut a ni’ tih an sawi.
Berlin-a hmunpui nei, tlawmngai pawlinsumdawng hruaitute leh mi thiamte nena an zirnaah hian ram 180-te chu an teh.
0 atanga 100 (a fihlim ber 100 pein a nasa ber 0) pek niin kumin hi vawi 10 an tihchhuahna niin ram 180 zinga hmun thuma thena hmun hnih chuan 50 an hmu phak lo.
Ram 180 hian chawhruala an hmuh chu 43 a ni a. Ei ruknaah hian ram thenkhatin hma an sawn laiin thenkhat an tlahniam thung.
“Kum 2012 atanga enin ram 25 chuan hma an sawn a, ram 23 erawh chu an hnungtawlh,” tiin report-ah hian tar lan a ni.
Mihring dikna chanvo pawh ei ruk tamna ram apiangah palzut nasat a ni tih zirnaah hian hmuh a ni bawk.
Europe khawthlang lam leh European Union ramte chu ei rukna laka fihlim ber ber ram an ni hlawm a, heng ramte hian a chhe berah pawh 100-ah 66 an hmu phak a. Sub-Saharan Africa an tih huam chhunga awm ramte chu ei rukna nasatna ram niin 33 vel an hmu pha hlawm.
Denmark, Finland leh New Zealand ramte chu ei ruk awm lohna ber niin 88 an hmu phak hlawm a. A tha zual ram 10 zingah hian Norway, Singapore, Sweden, Switzerland, Netherlands, Luxembourg leh Germany ramte an tel phak bawk.
Transparency International-in a chhutnaah hian ram 180-te hian ei ruk dona kawngah hma an lak tur thu sawi reng mah se ram 131 chuan hma an sawn lem lo tih an sawi.
South Sudan, Syria leh Somalia ramte chu ei ruk tamna ber ram an ni a. Heng ramte hi ram buai leh mi pakhatin thunei taka ro a relna an ni hlawm a. Anmahni ang chi ram dangte pawh an dinhmun a sang hlawm lo va, heng zingah hian Venezuela, Yemen, North Korea, Afghanistan, Libya, Equatorial Guinea leh Turkmenistan te pawh an tel.
Middle East leh Africa hmar lam ramte pawh ei ruk dona kawnga hma an la an intihnain awmzia a la nei lutuk hlawm lo va, tehnaah hian 100-ah 39 chauh an hmu phak hlawm.