Mizoram sorkarin Village Council (VC)-te hnena sorkar laipui (15th Finance Commission) atanga administrative cost 5% lak tumna order rang taka sut (cancel) tura an phut thu BJP Mizoram Pradesh-in sawi.
Thuchhuah an siamah BJP Mizoram Pradesh chuan, 15th Finance Commission grant atanga state sorkarin chanvo lo lak a tum hi 15th Finance Commission guidelines kalh a nih thu sawiin, state sorkar hian state own resource atanga lo pek belh zawk tur an nih thu an sawi a. “MNF sorkar hian Local Self Govt (VC)-te enkawlna sum ruahmantu tur state 2nd Finance Commission pawh a din duhlo chunga Central Finance Commission Grant lo cut-na hi dan bawhchhiatna, corruption lian tak a ni,” an ti.
BJP Mizoram Pradesh chuan VC-ten an khua theuh hmasawnna an thawhna tur atanga administrative cost anga sum lak thensak a tum hian thingtlangmite engahmah an ngaih lohzia an tihlanna an ngaih thu an sawi a. Sorkar laipuiin Mizoram VC-te chanvo tur 15th Finance Commission grant a pek hi thingtlang khaw tinte hmasawnna tura constitution rights a ni tih hre thar turin sorkar an ngen tih an sawi.
Mizoram sorkarin order a lo siam tawh (Letter No:G.21016/5/2021-DTE(LAD) PLAN, AIZAWL JANUARY 2022) hi a rang thei ang bera sutna thupek tichhuak tura an phut an sawi a. Mizoram sorkarin administrative cost lak nana order a siam tawh hi a sut lo a nih chuan sorkar laipuiah compliant an thehluh nghal tur thu an sawi bawk.