Kum rei pawh a la ni lo. February 2018 khan Netflix CEO Reed Hasting chuan Delhi-a sumdawng inkhawmpui lian pakhatah nakin lawka subscriber maktaduai 100 te hi India atangin a ni ang, a ti kha a ni a.
An huam chin tihzauh an tumna leh internet mantlawm vangte’n Mr Hasting hi a phur viau ni turah a ngaih theih. Kum thum a liam meuh chuan a beisei angin a thleng lem lova, a phur surh ta lem lo hle bawk.
Hei ha, Hui ha!
Karhmasa mai khan India rama Netflix chetthat lohna chungchangah vuivaina a sawi chhuak hial.
Califonia-a inkhuar Netflix hotupa hian, “India rama kan hlawhtling viau lo hi a luhaithlak angreng khawp mai,” a ti chuai raih.
India rama streaming market hlutna hi $Billion 2 chuang lawih a ni mek a, kum ruk kaltaa chechhuak tawh Netflix hian subscriber maktaduai 100 vel neih ngei a tumna chu boruakah a tham ral rih a ni ber mai.
Tun dinhmunah man chawi subscriber maktaduai 5.5 vel an nei a, khawvela streaming lian ber hian a elpui Disney+Hotstar (Mtd. 46) leh Amzon Prime Video (Mtd. 19) te hnung daihah a la tal faih faih.
India hi entertainment market \hang duang tak niin, chhungkaw maktaduai 200 chuangin Tv set an neih tawh bakah thlakhata $4 ang velin channel hmuhnawm tak tak an pawt mek. Film, sport leh news te chu awlsam tein an hmetchhuak zung zung thei.
Thil mak a thleng
A bik takin true story behchhana siam show te hi mit tla lek lekin an en, a tih theih a. SonyLIV-a tihchhuah Scam 1992 phei chuan rampum a tuamchhuak tih tiheh tur khawpin zan khat thil thu-ah sawi laih laih a tling.
Hmabak hautak
Hengte avang hian Netflix tan dam khawchhuah a harsat phah hle dawn a, local content lama rilru a pek tam a ngai lehzual ang.
Tunhnai khan thla tina subscribe man nasa taka tihniamin, mobile atanga en theih tur phei chu Rs 149 chauh a ni tawh. Film thar 50 chuangzet atan $Mtd. 400 zet a vawmlut der tawh a, hetah hian Hindi tawng hman film leh show 30 chuang a awm.