Khawvel awlsamna hi inven uluk nan i hmang ang u
Khawvel a changkang zel a, a zim sawt tawh hle bawk. Mut hmun atangin khawiah pawh kan bazar thei a, ni hnih khat lekah khawvel letliamah kan zin thei tawh bawk. Hengte hian kawng tam takin awlsamna min thlen a, tunlai thiamna hmanga awlsamna hian mitin min chhawk hle bawk nite pawhin a hriat a ni.
Chutihrual erawh chuan hriat ngai loh hri a rawn leng a, khawvel pumpui kan buai a, khawvel letliama mite tawrh ang chu kan tawrh a ni ve tho a, kan khawvel hi a buai zo ta a ni ber mai. Invenna leh inenkawlna tha bik a awm thei chuang lo a, inven chu mitin mawh a ni ber mai.
Thlawhtheihna hmangin khawvel ramdang atangin Mizoram chhung ngeiah pawh rawn thlawk lut an awm reng a, Kum thar January 1 atanga January 25 chhung khan, India ram pawn (international passenger) atanga khualzin hi mi 258 Mizoramah an lut tawh a, mi pahnih chu hri an kai tih hmuh chhuah an ni a. Heng mite hi Singapore leh Australia atanga rawn thlengte an ni.
January 6, 2022 khan Mizoram pawn atanga khual zin mi lo thleng hlimte chu Covid-19 leng kara himna tura dan (SOP) chu Mizoram sorkarin khauh zawka kalpuiin, sorkarin a pawm china RT-PCR test-a negative result nei te tih loh RAT test hmanga khualzin lo lutte chu endik vek turin thupek a tichhuak a. He thupek hman tan a nih atanga January 26, 2022 thleng khan Lengpui Airport-ah flight 89 awm tawhin khualzin 5,596 an lo lut tawh a. Heng zingah mi 3,259 te RAT hmanga endik an niin, hri kai 579 hmuhchhuah a ni tawh bawk.
Hetiang hi kan dinhmun a nih chhoh leh tak avangin kan fimkhur lehzual a ngai hle mai a, sorkar pawh hian a bik takin, ram pawn atanga lo lutte hi khuahkhirh tha se la, ramchhung hmun dang atanga lo lutte ngaihthah chuang lo a, ruahmanna a siam thiam zel hi a tul hle awm e. Hri leng a la reh lo tih kan hriatthar deuh deuh a va tha em.