Champhai district chhunga tlawmngai pawl hrang hrang te’n Champhai bawrhsap Maria CT Zuali sawn chhuahna order sut tura sorkar an karna kal zelah nimin khan Republic day an boycott a, bawrhsap in a bangla a chhuahsan tu dan tumin bangla bulah an riah chilh.
An ruahman lawk angin Champhaia tlawmngai pawlte chu Republic Day boycott nimin zing dar 6 bawr vel khan Bawrhsap bangla bulah an pung khawm a, hetihlai hian Champhai bawrhsap Maria CT Zuali leh sorkar mi pawimawh tlemte chuan zing dar 6-ah India hnam puan zar pawt pharhin hun an hmang thung.
Bawrhsap leh mi tlem te in Republic Day lawmna pualin hnam puan zar pawt pharh mahse zing dar 8-a Republic Day lawmna puala inkhawm buatsaiha tel tum sorkar mi pawimawh dangte chu tlawmngai pawl duty te hian an lo dang a, buaina lian tham chhuak a awm lo.
A thlavang hauha, sorkar laka an lungawilohna kawng hrang hranga an lantir laia Republic day a ruka a hoa an la hmang chu tlawmngai pawl te hian an hrethiam lo hle a. Mipui pungkhawm hmaa insawifiah tura ngen a nih angin Bawrhsap Maria-i chuan sorkar mi a nih angin sorkar do zawnga che thiang a nih loh avangin Republic Day lawmna puala flag pawt pharh a nih thu a sawi.
Champhai Jt. NGO chuan sorkara an thil phut te tihhlawhtlin a nih hma chu beih zel an tum thu an sawi a, action plan an lo siam tawh dawr khar, pisa khar, kawng zawh leh Republic Day boycott te an tih zawh hnuah pawh sorkar in thawm a la neih loh avangin na zawkin hmalak chhunzawm an tum.
Nimina Republic day boycott tura thawk chhuak tlawmngai pawl hrang hranga tel leh thalai te chu Bawhrsap bangla kawtah pungkhawm chhunzawmin, Bawrhsapin a bangla a chhuahsan tur dan tumin haw an tum tawh lo tih MZP sub headquarters hruaitute’n an sawi.
Thudawn danin, Champhai thalai rual te chu nizan khan Bawrhsap bangla kawtah hian an inkulhin an riah chilh a ni.
THE ZOZAM TIMES zawhna chhangin Jt. NGO hruaitute chuan, an thil phut a hlawhtlin hma chu chawlhsan an tum lo a, an hmalak zel dan tur an rel leh dawn tih an sawi a, sorkar in thawm a nei lo reng a nih chuan tiam chin awm lo atotal bandh huaihawt zawng pawhin an kal lo ang tih an sawi theih tawh loh thu an sawi.