India-a thawhna service lian, Air India chu Tata Group chuan a la chhawng fel ta a, October thla khan leiba nasa tak an neih avangin airline hi an tlachhia a ni.
Tata hian $ tluklehdingawn 2.4 pein a lei chhawngtuten leiba an neih tam lutuk loh nan ruahmanna an siamsak a ni.
Chi atanga steel lam thlenga sumdawnna kalpuitu hian he airline hi kum 1932 khan dinin kum 1953 khan sorkar hian a la chhawng a ni.
Inhlan chhawn a nih tak avang hian kum khat chuang Air India hralh tum thu hla chu a tawp dawn ta a, $ tluklehdingawn 9.5 zet a hloh hman a ni.
Tata Group chairman Natarajan Chandrasekaran chuan an lak chhawn hma, Ningani khan Prime Minister Narendra Modi khan a hmu a ni.
Board of directors-a thu laite chu Tata Group-in mi thar an ruat theih nan an bâng a. Engtik atang nge Tata hnuaiah an thlawh tan theih dawn tih erawh hriat a la ni lo.
Air India hralh a ni ta hi Modi-a tan hlawhtlinna a tling a. Sorkar hian hralh a tumna a rei tawh a, kum 2014-a thuneihna a chan atang khan a sum hlohna lian tak a ni.
Air India hian thil dang neih tam tak neiin London-a Heathrow airport-ah pawh slot a nei a, thlawhna 130 chuang leh a khalhtu leh thawktu sang chuang an nei.
Tata Sons hian airline pahnih – Vistara leh AirAsia India a nei sa a. Vistara hi Singapore Airlines nena an tihdun a ni a. AirAsia India erawh Malaysia AirAsiaBhd nena an kalpui, chuan man tlawm chi a ni.
Air India hian kum 2007 atang khan sorkar enkawl tho, ram chhunga thlawk chi, Indian Airlines nena suih zawm an nih atangin an hloh tan tawh a. Dan anga kalpui leh tur chuan chhiah tam tak a pek a ngai bawk.
Sorkar chuan kalpui zel chuan ni tin $ maktaduai 2.6 vel hloh a ni dawn tih a sawi.
Management lam chuan thlawhna tui leh tumhmun hman man sang te, chuan man tlawm leh si leh India pawisa hlutna tlahniam te chu an chet chhiat chhan ni berin an sawi.
Air India hi tlachhiain hralh hial ngai mah se a thil neihte erawh a la hraw hle a. Thlawhna 130 bakah ram chhunga thlawkte tum theihna hmun 4,400 leh ram dang atanga thlawkte tum theihna hmun 1,800 a la nei a. Ram pawn lamah tumhmun 900-ah a tum thei bawk a, sum a hmuhna tam ber hi ram danga a thlawhna hi a ni.
Aviation ministry-in nikum March thlaa a thil neih – ram, in, thlawhna a neih hlut zawng chu Rs. tluklehdingawn 450 a ni.
Air India hian thil hlu tak tak lak khawm (art & collectible items) 40,000 chuang zet a nei bawk a, heng zingah hian Spanish surrealist artist Salvador Dali-a’n kum 1960 vela meivap bawm (ashtray) a siam leh pek pawh a tel a. Dali-a hian airline-in sai note an pek lawmthu sawi nana a pek let niin sai hi Spain-ah an phurh thlensak thlap vek bawk a ni.