BJP Mizoram pradesh-in sports minister Robert Romawia Royte-in khawpuia chengte tana SEDP-a trade siam a rawtna social media-ah chhiar tur awm nia sawiin, mak an tih thu an sawi a. “SEDP-in khawpui a huam loh thu an sawilang ngai lo, dawt hmanga campaign mai an nih zia a tilangtu a ni” an ti.
“MNF sorkar hian SEDP sem tumin kum 3 hun an hmang tawh a, inthlan hmaa MNF president, tuna chief minister Zoramthanga’n campaign auhlaah hmangin, in tinah Rs. nuai 3 an sem tur thu leh NLUP dawng tawh te pawhin an dawn tur thu a sawi” BJP chuan an ti a. “SEDP chu a bu siama engkim an peih tawh thu pawh MNF campaign au hla a nih laiin, SEDP chu MNF sorkar chuan a inziak ang ni lovin nasa taka her rem an tum nge ni, rawtna thar te an siam leh hi Mizo mipui hmuhsitna lian tak leh SEDP hi an lo tih tak tak loh zia tilangtuah kan ngai” an ti.
BJP chuan Aizawl East-II bialtu MLA, minister of state ni bawk Robert Romawia Royte chuan khawpuia mirethei ten ram an neih ve loh avangin Lo neih (Agri) leh Huan siam (Horti) lam hawi SEDP chu an tan a rem ve lo tih a sawi leh khawpui mite tana trade dang thlan tur chief minister hnena rawtna a thlen chauh chuan SEDP chu khawpui mite tan a ni ve lo tih a tilang chiang hle niin an sawi a. Chief minister pawhin minister rawtna thlen chu ‘SEDP-ah telh ngei a ni ang’ a ti pawhin chief minister meuh pawhin SEDP chu a chianglo hle tih a tilang niin an sawi.
“Campaign laia SEDP chungchanga engkim peihfel sa a nih thu an sawi ang ngeiin Rs. nuai 3 chu chhungtin hnenah chhuanlam tur dang zawng lova sem mai turin kan phut a ni” BJP chuan an ti bawk.