ZPM Working President K Sapdanga chuan dan loa Myanmar atanga kuhva tawlh chungchangah ZPM party mi leh sa ngeite pawh an inrawlh tih chu an phat loh thu a sawi a. Heng inhnamhnawihte hi inthiarfihlim tura an inngenna chu an party dinna a nih thu a sawi.
K Sapdanga hian, “Tumah party angin an inrawlh hauh lo. Amaherawhchu, a inrawlhte zingah tu party mite pawh an tel ang tih erawh thudik a ni. Chu chu keini pawhin kan pha lo. Kan party mi leh sate zingah lo hnamhnawih kan lo awm palh a nih pawhin, tun atang chuan lo inthiarfihlim turin kan inngen a ni,” tiin, nimina thu thar thehdarhtute an kawmnaah ZPM party mi leh sa inrawlh chungchanga The Zozam Times zawhna a chhang.
“A hma zawng kha chuan, smuggling nia mawi loin a rem rem khan an lo ti bawrh bawrh tlang a ni a. Tunah erawh chuan tihian a lo tlang thang ta a. Chuvangin, keini party dinna chu, kan sorkar hunah chuan, hei hi dan hnuaiah kapui theih a ni a, India dan hnuaiah pawh kalpui thei a ni tihte a ni a, chutiang chuan kalpui pawh kan tum a ni. Kan mi leh sa te, chutianga an inrawlh an lo awm palh pawhin inthiarfihlim a, inhnamhnawih lo turin kan ngen tih hi kan dinna a ni,” a ti bawk.