Manipur-a assembly inthlan turah Congress chuan political party panga zet nen thawhhona tur thuthlung an siam.
Congress kaihhruaia tangrual turte hi CPI, CPI-M, JD-S, RSP leh Forward Block te an ni.
“Tanghoten kan tum ber chu kan hmaa inthlan lo awm tura BJP hneh hi a ni,” tiin Manipur Congtess president N Loken chuan a sawi.
Party parukte tanho tur thu hi Ningani khan an zavaia chanchinbumite kawmin Congress Bhawan, Imphal-ah an puang.
Tanghoten bial dinna tur an insem tur chungchangah Manipur Congress chief chuan, “Tangho zinga miten candidate an lo puan tawhte chu engmah tihdanglam a ni lo vang,” a ti.
Loken-a chuan tangho thar ni tate hian candidate an lo puan tawhnaa an indin thuahna tih lovah chuan indin thuah belh lovin candidate an intawm dawn tih a sawi bawk.
An state-a rorel lai, BJP chu na taka beiin Manipur Congress president chuan ‘BJP kaihhruaina hnuaiah chuan mipui rorelna chu a derthawng’ niin a sawi.
“Tangho party-te hian ram hi mi pakhat invawrh lara thuneihna pumhlum a channa tur kawng dal turin thuthlung thuhmun kan vuan a ni,” a ti bawk.
Manipur Legislative Assembly inthlan hi thawh hnihin, February 27 leh March 3, 2022 hian neih a ni dawn a, bial 60-ah inthlan hi neih a ni dawn a, vote tlate chu March 10, 2022-ah chhiar a ni ang.
Tuna Manipur Legislative Assembly team kal mek hi March 19, 2022 hian a tawp dawn a, assembly inthlan hnuhnung ber kha March, 2017-a neih a ni a. Inthlan zawhah BJP, National People’s Party, Naga People’s Front leh Lok Janshakti Party chuan inremna siamin tanghovin sorkarna an siam a. BJP hruaitu, N. Biren Singh chu chief minister a ni.