ZPM Leader Lalduhoma, MLA chuan Mizoram chu India rama state zingah state sorkar hriatpuia smuggling ti awmchhun a nih a rin thu a sawi a. An chhui chian chinah sorkar leh party hruaitu zingah hlawkna tel an awm tih an sawi bawk.
ZPM elected OB leh Leader ten nimin khan Aizawl Press Club-a thuthar lakhawmtute an kawm a. He hunah hian Lalduhoma chuan Central Board of Indirect Taxes & Customs, Ministry of Finance-in kuhva lakluha tariff chawi zat tur a siam chu kg 1-ah cheng 371 a ni a, hei bakah Basic Custom Duty zaa za leh GST zaa panga pek leh tur a nih thu a sawi a. Dan anga kuhva lalut tur chuan chawi belh fe a ngai tih sawiin, “Hemi awmzia chu India sorkar hian a thu chuan kuhva lak luh a phal a, a tak takah erawh chuan a pha lo tluk a ni,” a ti.
Congress sorkar hnuaiah kum hnih chhung kuhva tawlh ruk chu kalpuiin, MNF sorkarin a chhunzawm zel hnuah home ministry chuan kum 2019 khan Manipur leh Mizoram chief secretary te chu titawp turin hriattirin, hetah hian India leh Myanmar sumdawngte inkarah Mizoram sumdawngte chu luankawrah tangin, MAMCO in Mizorama thar chhuah anga lantirin transit pass a pek thute tar lan a nih thu a sawi a. “Mizoram sorkar chuan chhui chian emaw, action lak emaw a tum miah lo a. Sorkar mitmei ven tur a awm miau loh avangin kuhva tawlhruk chu ualau taka kalpui a ni ta zel,” tiin Lalduhoma hian a sawi.
ZPM leader hian kuhva sumdawnnaah hian pawl lian zual pathum an awm thu leh, he pawla tel ve tur chuan cheng nuai 35 thawh a ngai niin a sawi a. Assam Rifles leh Custom ho an tawn tlang theih nan chung pawl pathumte leh Home Minister chuan fing takin ruahmanna an siam ta niin a sawi a, “Dan hrulah, mitsiai chungin E-Way Bill hmangin sorkar chuan GST a la ta a ni,” a ti a; sumdawng pawl paliin kal kawngah harsatna an tawh loh nan an aiawha hma latu tur ruling party mi thiltithei tak chu ziak meuha ruatin, kuhva bag-ah hian special bag te, VIP quota te a awm leh zel a, Lengpui airport atanga thlawhna hmanga thawn chhuah a ni hial tawh niin a sawi bawk.
Nikum July thlaa Champhai Bawrhsap Maria CT Zuali chuan Home department-a report chipchiar tak leh hmalak dan tur rawtna tha tak a thehluh chuan sorkar a ko ei zo lo nia sawiin, “Champhai district mipuiten Champhai DC, Pi Maria CT Zuali chhuak lo tura sorkar an ngenna chu public interest a nih sorkarin a hai nge, vawiin thlengin tihhlawhtlinsak chu sawi loh, an lam hawia inbiakna emaw hmalakna hrim hrim an nei lo chu a mak hle a ni,” a ti.
Kuhva tawlh ruka a mawhphurtu bulpui ber chu sorkar a nih thu Lalduhoma hian a sawi a. ZPM an sorkar chuan kuhva a ni emaw, thil dang a ni emaw, dan ang taka an kalpui tur thu a sawi a. An party mi leh sa zingah he thila inhnamhnawih an awm a nih chuan tun atang chuan lo inthiarfihlim turin an beisei tih a sawi bawk.
Sumdawng pawl paliin kal kawngah harsatna an tawh loh nana an aiawha hma latu tura an ruat nia a sawi chungchangah zawhna chhangin, “Sorkarah nihna nei te leh party-ah pawh hruaitu te an ni, an ruatna copy pawh kan nei thlap,” Lalduhoma’n a ti.
Kuhva tawlh chungchanga hlawkna tel zingah sorkar hotu lian tak tak te an tel em tia zawhna pawh, “Hlawkna tel an awm a, sorkar leh party hruaitutah pawh, Chief minister office thleng hian a hriatpui a ni tih an party in kan chhui chian chinah kan hriatpui a ni,” tiin an chhang.
ZPM Working President K. Sapdanga pawhin thu sawiin, dan loa Myanmar atanga kuhva tawlh chungchangah political party dang zawngte aia duh lohna lan tira vantlang hriata puanzar leh umzui kawngah hma hruaitu zelah an inngaih thu a sawi a. “Tun hnaiah Bawrhsap pahnihte maksak tak maia sorkarin a sawn hian a hmun ngeiah kalin, ramri ven kawngah thawk tha em em DC leh smuggling chungchanga thawk tha em em Champhai DC te an tual zawlah ngei kalchilhin khaw mipuite hmaah ZPM chuan aiawh intirin kan puang chhuak bawk a. Mipui vantlan hriatah smuggling chungchang leh dan leh thupek kenkawh maksakah hi chuan a fak zawngin emaw, a chhui zui zawngin emaw, ZPM hian hma kan hruaiah kan inngai a ni,” a ti bawk.